Çərşənbə günü İranın sərt-xətt parlamenti islahatçı prezident Məsud Pezeşkianın Nazirlər Kabinetinin bütün üzvlərini təsdiqləyib. Son iyirmi ildən artıq müddətdə ilk dəfədir ki, bir lider bütün məmurlarını qurumdan keçirə bilib.
Seçdiyi məmurların təsdiq edilməsi may ayında helikopter qəzası nəticəsində sələfinin ölməsindən sonra uzun müddətdir deputat olan və prezident seçilən Pezeşkian üçün erkən qələbəni göstərir.
Pezeşkian mübahisəli namizədləri irəli sürməməklə, İran teokratiyasındakı bütün güc mərkəzlərinə xoş gələn adları seçməklə Nazirlər Kabinetinin təsdiq edilməsinə müvəffəq olub.
Pezeşkianın seçki kampaniyasında iştirak etmiş keçmiş xarici işlər naziri Məhəmməd Cavad Zərif daha sonra Nazirlər Kabinetinin seçimləri ilə əlaqədar yeni liderin vitse-prezidenti vəzifəsindən istefa verib.
Bu məqamı vurğulayan Pezeşkian dərhal internetə İranın ədliyyə rəhbəri, şiə din xadimi və vaxtilə seçkilərdə üzləşdiyi sərt-xətt tərəfdarı olan ölkə parlamentinin sədrinin yanında dayandığı şəklini yerləşdirib.
O, orada "İran üçün konsensus" yazıb.
Pezeşkianın yeni Nazirlər Kabinetinə seçdiyi insanlar arasında İranın yeni xarici işlər naziri olacaq 61 yaşlı diplomat Abbas Araqçi də var.
Araqçi 2015-ci ildə dünya gücləri ilə sanksiyaların ləğvi müqabilində Tehranın nüvə proqramını məhdudlaşdıracaq nüvə sazişini imzalayan müzakirəçilər qrupunun üzvü idi.
2018-ci ildə o vaxtkı prezident Donald Tramp ABŞ-ı sazişdən çıxarıb və İrana qarşı daha çox sanksiyalar tətbiq edib. Pezeşkian prezidentlik kampaniyası zamanı nüvə sazişini canlandırmağa çalışacağını bildirib.
Deputatlardan ən çox dəstək alan namizəd - 288 deputatdan 281-nin səsini toplayan ölkənin yeni müdafiə naziri Əziz Nəsirzadə olub.
Nəsirzadə 2018-2021-ci illərdə İran Hərbi Hava Qüvvələrinin rəisi olub.
Səhiyyə naziri Məhəmməd Rza Zəfərqandi ən az - 163 səs toplayıb.
Təklif olunan yeganə qadın nazir, 47 yaşlı memar, mənzil və yol naziri Farzanə Sadiq 231 səs toplayıb. O, İranda son on ildən artıq müddətdə ilk qadın nazirdir.
Parlament, həmçinin Pezeşkianın təklif etdiyi kəşfiyyat naziri vəzifəsinə İsmayıl Xətibi, eləcə də mərhum prezident İbrahim Rəisi dövründə çalışmış ədliyyə naziri Əmin Hüseyn Rəhimini təsdiqləyib. Pezeşkian həmçinin Rəisinin sənaye naziri Abbas Əliabadini energetika naziri postuna qoyub.