Macarıstanın Baş naziri Viktor Orban Ukrayna prezidenti Volodimir Zelenski ilə danışıqlar aparmaq üçün Kyivə gedib. Bu barədə Reuters Orbanın mətbuat xidmətinin rəhbəri Bertalan Havasiyə istinadən məlumat yayıb.
Görüşün sonunda Orban və Zelenski Ukraynanın ABŞ, Aİ və bir sıra digər ölkələrlə artıq imzaladığı müqavilələrdən nümunə götürərək, hər iki dövlətin qlobal əməkdaşlıq sazişi üzərində işləyəcəyini bildiriblər.
Ukraynadakı müharibədən danışan Orban deyib ki, o, Zelenskiyə Rusiya qoşunları ilə hazırda mövcud olan təmas xəttində dərhal atəşi dayandırmağı təklif edib.
"Mən cənab prezidentə dedim ki, onun təşəbbüsləri beynəlxalq diplomatiya qaydalarına görə çox vaxt aparır, ona görə də mən cənab prezidentdən xahiş etdim ki, bir az fərqli bir şey etməyin mümkünlüyü barədə düşünsün: atəşi dayandırmaq, sonra isə Rusiya ilə danışıqlar aparmaq, çünki atəşkəs bu danışıqların sürətini artıracaq" - deyə, Macarıstanın Baş naziri öz təşəbbüsündə israr etmədiyini və bu məsələ ilə bağlı Zelenskinin arqumentlərini qəbul etdiyini bildirib.
Ukrayna prezidenti qeyd edib ki, Rusiya-Ukrayna müharibəsi mövzusundan əlavə onlar "qonşuluq münasibətlərimizin ən fundamental məsələlərini: ticarət, sərhədyanı əməkdaşlıq, infrastruktur və enerji məsələlərini müzakirə ediblər".
O həmçinin bildirib ki, Rusiyanın genişmiqyaslı müdaxiləsi səbəbindən Ukraynanı tərk etmiş qaçqın ailələrinin uşaqları üçün Macarıstanda ilk Ukrayna məktəbi açıla bilər.
Orban öz növbəsində, Macarıstanın Ukrayna iqtisadiyyatının modernləşdirilməsini dəstəkləməyə hazır olduğunu, həmçinin rəsmi olaraq iyulun 1-dən 2025-ci il yanvarın 1-dək davam edəcək Aİ Şurasına sədrliyi dövründə Ukraynaya kömək etmək niyyətində olduğunu bildirib.
"Ukraynaya ən yaxşısını arzulayıram və Macarıstanın sədrliyi dövründə biz sizə əlimizdən gələn hər şeydə kömək edəcəyik", Macarıstanın Baş naziri əlavə edib.
Bu, Orbanın Rusiyanın Ukraynaya genişmiqyaslı hərbi müdaxiləsi başlayandan bəri ilk səfəridir.
Qərbin Ukraynaya hərbi yardımını tənqid edən Orbanın səfəri Macarıstanın Avropa İttifaqı Şurasına sədrlik etməsindən bir gün sonraya təsadüf edib.
Aİ liderləri arasında Rusiya prezidenti Vladimir Putinlə ən yaxın əlaqələri ilə tanınan Orban 2022-ci ilin fevralında Rusiyanın işğalı başlayandan bəri Aİ-nin Ukraynanı Kremlin təcavüzündən müdafiəsinə dəstək təşəbbüslərinə tez-tez qarşı çıxıb.
Orban keçən il Putinə demişdi ki, Macarıstan heç vaxt Rusiya ilə üzləşmək istəmir. 2024-cü ilin əvvəlində Aİ liderlərinə Macarıstan Baş nazirinin Ukraynaya yeni 50 milyard avroluq yardıma (53,67 milyard dollar) veto qoymasını ləğv etmək bir neçə həftə çəkib.
Ötən həftə Aİ Ukraynanın Avropa İttifaqına üzvlüyü ilə bağlı danışıqlara başlayıb.