Yəməndən atılan raket bazar ertəsi Qüds yaxınlığında yanğına səbəb olub və daha sonra husi üsyançıları İsrailin mərkəzinə uğurlu hücum həyata keçirdiklərini bildiriblər.
İranın dəstəklədiyi silahlı qrup Yaffanın cənub-şərqində "Nahal Sorek hərbi bazasını hədəf alan hərbi əməliyyat" həyata keçirdiyini və "zərbənin dəqiq olduğunu və yanğına səbəb olduğunu" bildirib.
Bu arada husilərin nəzarətindəki əsas televiziya xəbər orqanı ABŞ və Britaniya qüvvələrinin Yəməndə Amran və Saada əyalətlərini hədəf alan bir sıra hava hücumları təşkil etdiyini bildirib.
İsrail ordusunun France-Presse agentliyinə verdiyi məlumata görə, Yəməndən atılan mərmi Qüdsün qərbindəki Bet Şemeş bölgəsində ələ keçirilib.
"İsrailin mərkəzindəki Şfelat Yehuda, Yehuda və Laxiş bölgələrində səslənən sirenlərdən sonra IAF (İsrail Hərbi Hava Qüvvələri) Yəmən istiqamətindən İsrailə yaxınlaşan bir mərmi ələ keçirib", AFP-yə verilən açıqlamada deyilir.
"Mərmi İsrail ərazisinə keçməyib. Protokola uyğun olaraq sirenlər səsləndirilib" - deyə, bildirilib.
İranın dəstəklədiyi İraqdakı İslam Müqaviməti koalisiyası bazar ertəsi İsraildəki “həyati vacib hədəflərə” dörd pilotsuz təyyarə hücumu həyata keçirdiyini iddia edib, lakin bir sıra Telegramdakı paylaşımlarında hədəflərlə bağlı təfərrüatları açıqlamayıb.