Oktyabrın 27-nə keçən gecə Rusiya Xarkiv vilayətində İzyuma zərbə endirib - səkkiz yanğınsöndürən yaralanıb. Bu haqda vilayət administrasiyasının rəhbəri Oleq Sinequbov bildirib.
Onun sözlərinə görə, onlardan dördü xəstəxanaya yerləşdirilib, vəziyyəti orta ağırdır, qalanlarının xəstəxanaya yerləşdirilməsinə ehtiyac olmayıb. Sinequbov yazır ki, əvvəlcə zərbə S-300 zenit-raket kompleksindən endirilib. Ukraynanın Fövqəladə Hallar üzrə Dövlət Xidməti xəbər verir ki, zərbə nəticəsində yanğınsöndürmə idarəsinin binasına və 13 avtomobilə ziyan dəyib.
Ukraynanın daxili işlər naziri İqor Klimenko qeyd edib ki, zərbə Xarkiv vilayətinin yanğınsöndürmə xidmətinin iki yüz illiyi günü vurulub.
Bu arada Ukrayna prezidenti Volodimir Zelenski cümə günü bildirib ki, alternativ Qara dəniz ixrac dəhlizi bütün təhdidlərə baxmayaraq fəaliyyətini davam etdirəcək.
Prezident Aparatı bildirib ki, Zelenski Böyük Britaniyanın baş naziri Rişi Sunak ilə telefon danışığında marşrutun fəaliyyəti və gəmi sığortası məsələlərini müzakirə edib.
Cümə axşamı Kyivdə yerləşən Barva İnvest konsaltinq şirkəti, Britaniyanın risklərin idarə edilməsi şirkəti Ambrey və "Ukrayna Limanları" mütəxəssis firması bildirmişdi ki, Ukrayna Rusiya hərbi təyyarələri və dəniz minalarından yarana biləcək mümkün təhlükələrə görə dəhlizdən istifadəni dayandırıb.