Əfqanıstan rəsmiləri Taliban üsyançılarının ölkənin şərqində Pakistanla sərhəd bölgədə onlarla avtobus sərnişinini oğurladıqlarını bildirib.
İncident ölkənin cənub-şərqində yerləşən Paktiya vilayətinin Syed Karam bölgəsində baş verib.
Vilayət rəsmiləri və sakinlərin bildirdiyinə görə, yüzlərlə Taliban döyüşçüsü sərnişinlərin naməlum istiqamətdə aparılmasından öncə bir neçə saat ərzində 30-dan çox avtomobili yolda saxlayıb axtarış keçirib.
Talibanın sözçüsü Zəbiullah Mucahid girov götürülən 30-dan çox adam arasında Əfqanıstanın səkkiz mühüm rəsmisinin olduğunu deyərək, rəsmilərin aparılan insanların qadın və uşaqlardan ibarət olduğuna dair iddialarını təkzib etib.
Əfqanıstan təhlükəsizlik qüvvələri ərazidə axtarış əməliyyatına başlayıb.