"İpsos" agentliyinin bazar ertəsi dərc etdiyi sorğuların yekun nəticələrinə görə, istefada olan general, NATO-nun keçmiş rəsmisi Petr Pavel Çexiya Respublikasında keçirilən prezident seçkilərinin ikinci turunun öncəsi təxminən 18 xal fərq ilə keçmiş baş nazir, milyarder Andrej Babişə qalıb gəlib.
Çexiya prezidentlərinin səlahiyyətləri bir o qədər də çox deyil. Onlar baş nazirləri, mərkəzi bank rəhbərlərini təyin edə bilir və xarici siyasət məsələlərində məhdud rola malikdir. Onlar, həmçinin ictimai müzakirələri formalaşdırır və siyasi məsələlərdə hökumətlərə təzyiq göstərə bilər.
Yanvarın 20-22-də keçirilən rəy sorğularında Pavel 58,8%, Babiş 41,2%-ə qədər səs toplayıb. Namizədlər yanvarın 27-28-də seçkinin ikinci turunda görüşəcək.
Sağ mərkəzçi hökumət tərəfindən dəstəklənən müstəqil namizəd Petr Pavel qərbin siyasətini və Rusiyanın təcavüzünə qarşı müdafiəsində Ukraynanı dəstəkləyir.
68 yaşlı Babiş Paveli sülhə təhlükə kimi qələmə verməyə çalışır. Keçən həftədən, seçkilərin birinci turundan bəri o özünü müharibəyə qarşı bir qüvvə kimi təqdim edir.
Onun seçkiqabağı şüarlarında "Mən Çexiyanı müharibəyə sürükləməyəcəyəm" və "Mən diplomatam, əsgər deyiləm" ifadələri səslənib.
Pavel iddiaları cəfəngiyyat adlandırıb.
Çex mediası dezinformasiya saytlarında və elektron poçtlarda Pavel əleyhinə geniş yayılmış mesajlar yayıldığı barədə məlumat verib.
61 yaşlı Pavel kommunist dövründən hərbçi olub. 1989-cu ildə demokratik "Məxməri İnqilab"ından sonra rütbələrdə yüksəməyə başlayıb. O, xüsusi təyinatlılar və hərbi diplomatiya sahələrində xidmət edib. 2012-2015-ci illərdə isə o, ordunun baş qərargahına rəhbərlik edib.
Daha sonra isə o, üç il alyansın baş katibinin əsas hərbi məsləhət orqanı olan NATO-nun milli ordu rəislərindən ibarət hərbi komitəyə rəhbərlik edib.