Avropa Birliyi son günlər Ermənistan və Azərbaycan qoşunlarının təmas xətti boyunca insanların ölümünə səbəb olan silahlı insidentlərdən çox narahatdır.
Bu barədə Avropa Birliyinin Azərbaycandakı missiya ofisinin məlumatında deyilir.
"Biz hər iki tərəfi dərhal atəşkəs rejiminə riayət etməyə başlamağa, güc tətbiqindən və ya istənilən hədələrdən çəkinməyə və Dağlıq Qarabağ münaqişəsinin sülh yolu ilə nizamlanmasına yönəlmiş səyləri davam etdirməyə çağırırıq" deyə məlumatda bildirilib.
AB xatırladır ki, Dağlıq Qarabağ münaqişəsinin siyasi nizamlanması üzrə səylərin aktivləşməsində iştirak etməyə və ATƏT-in Minsk qrupunun tam dəstəyi ilə sülhün əldə edilməsi üzrə səylərə töhfə verməyə hazırdır.
"Biz ATƏT-in Minsk qrupunun səylərinə və 3 həmsədrin işinə, xüsusilə 2013-cü il noyabrın 19-da Vyanada Azərbaycan və Ermənistan prezidentləri arasında görüşdə razılaşdırıldığı kimi, ən yüksək səviyyədə danışıqları davam etdirməyin zəruriliyinə tam dəstəyimizi yenidən təsdiq edirik", bəyanatda vurğulanıb.