Ramazan ayı Britaniya telekanalında canlı Azan yayımlanacaq [Audio]

Britaniyanın əsas telekanallarından biri Ramazan ayı müddətində hər səhər müsəlmanlar üçün canlı Azan yayımlamağa qərar verib. Kanal-4 İslamı adətən ekstremizmlə əlaqələndirən cəmiyyətdə bu addımın bilərəkdən atıldığını vurğulayır.

Kanal-4 bir ay, orucun tutulduğu müddətdə hər gecə saat 3-də üç dəqiqəlik azan yayımlayacaq. Qalan dörd azana isə vebsayt vasitəsi ilə qulaq asmaq olar.

Proqramistlər bunun Britaniyada İslam haqda təsəvvürləri dəyişməyə və cəmiyyəti İslam barədə məlumatlandırmağa yönəldiyini deyirlər.

Britaniyanın Kanal-4 TV kanalı azan yayımlayacaq

Usama Həsən Londonda yerləşən Quilliam Fondunun İslam Araşdırmalar Mərkəzində baş tədqiqatçıdır. O, belə bir xəbərin Britaniyadakı müsəlmanlar arasında səs-küyə səbəb olduğunu deyir. “Mən müsəlman diskussiyalarına Onlaynda və bloqlarda baxıram. Kanal-4-ün Ramazanla bağlı açıqlaması geniş diskussiyalara səbəb olub. Bundan əvvəl insanlar dua vaxtı çatanda müsəlman proqramlarına peyk kanallarında baxırdılarsa, indi alternativ Kanal-4-ə də baxa bilərlər.”

Həsən bu qərarın gənc müsəlmanlar üçün də çox vacib olduğunu deyir.
Britaniyada aparılan son rəy sorğuları hər 25 yaşlarındakı 10 nəfərdən birinin müsəlman olduğunu göstərir. Kanal-4 bu yaş qrupundakı dinləyicilərin çoxluq təşkil edəcəyi üçün belə bir qərara gəldiyini deyir.

Həsən Britaniyadakı gənc müsəlmanların 2001-ci il 11 sentyabr ABŞ-a və 2005-ci il Britaniyaya edilən terror hücumlarının formalaşdırdığı fikirlər mühitində böyüdüklərini deyir. O deyir ki, gənc müsəlmanlar Britaniya ictimaiyyətinə inteqrasiya olunmalıdırlar.

Kanal-4-ün qərarı zidiyyətsiz deyil. Sağçı qruplar və bəzi media orqanları bu xəbəri həyəcan və narazılıqla qarşılayıblar. Britaniyanın ultra-sağşı “Britaniya Birinci” qrupunun sədr müavini Endryu Makbrid bu proqramı “İslam təbliğatı” adlandıraraq, qrupun buna qarşı kampaniyaya başladığını və artıq 5000-ə qədər imza topladığını deyir. “Britaniyada ərəb dilində Azanın yayımlanması məni də, çoxlarını da qıcıqlandırar.”

Britaniyanın müsəlman icmalarının bəzi üzvləri isə iddia edirlər ki, belə bir addım atmaqla Kanal-4 özünə reytinq qazandırmaq və qalmaqal yaratmaq istəyir.

Kanal-4 eləcə də Ramazan ayında İslamla və Britaniyadakı müsəlmanlarla bağlı bir sıra sənədli filmlər də nümayiş etdirəcəyini bildirib.