BMT-nin Baş Assambleyası Amerikanın Qüdsü İsrailin paytaxtı kimi tanınmasını rədd edən qətnaməni təsdiq edib. Qətnamə 128 lehinə, 9 əleyhinə və 35 bitərəf səslə təsdiqini tapıb.
Bundan əvvəl ABŞ-ın BMT-dəki səfiri Nikki Heyli digər BMT nümayəndələrinə xəbərdarlıq edib ki, o, cümə axşamı Baş Assambleyada ABŞ-ın Qüdsü İsrailin paytaxtı olaraq tanıması ilə bağlı nadir keçirilən fövqəladə sessiya zamanı qeydlər alacaq.
Heyli deyib ki, prezident Tramp ondan Birləşmiş Ştatların əleyhinə səs verən ölkələrin siyahısını tələb edib.
Tramp bu ayın əvvəli ABŞ-ın uzun illərdir yürütdüyü siyasəti dəyişərək, Vaşinqtonun Qüdsü İsrailin paytaxtı kimi tanıyacağını və orada yeni səfirlik inşa etmək üçün hazırlıqlar görəcəyini bildirib.
Bu açıqlamadan sonra bazar ertəsi BMT-nin Təhlükəsizlik Şurası Qüdsün statusu ilə bağlı verilən son qərarlara görə məyusluğunu ifadə edib və qətnamə qəbul etmək üçün səsvermə keçirib.
Şuranın 15 üzvündən 14-ü qətnamə layihəsinin lehinə səs verib, amma Birləşmiş Ştatlar veto səlahiyyətindən istifadə edərək onun təsdiq olunmasının qarşısını alıb.
Qüds
“Bu gün biz Təhlükəsizlik Şurasında təhqirə şahid olduq. Bu unudulmayacaq,” deyə Heyli bildirib.
ABŞ bazar ertəsi BMT-nin Təhlükəsizlik Şurasının prezident Trampın Qüdsü İsrailin paytaxtı kimi tanınması qərarını rədd edən qətnaməsinə veto tətbiq edib.
Şuranın qalan 14 üzvü Misirin hazırladığı ölçüyə dəstək verib.
Qətnamə layihəsində Trampın bu ayın əvvəllərində səsləndirdiyi qərar və ABŞ səfirliyinin Tel-Əvivdən Qüdsə köçürülməsinə dair dərin təəssüf bildirilib.
Qətnamə layihəsi bütün ölkələri diplomatik missiyalarının Qüdsə köçürməkdən çəkinməyə çağırır.
İsrail bu şəhəri paytaxtı hesab edir və bütün səfirliklərin buraya köçürülməsini istəyir.
Fələstinlilər isə Şərqi Qüdsü gələcək dövlətlərinin paytaxtı olaraq görmək istəyir və Birləşmiş Ştatların artıq sülh prosesində etibarlı tərəfdaş olmadığını deyir.