ABŞ Dövlət Katibi Entoni Blinken çərşənbə axşamı Bayden adsministrasiyasının alyansla bağlı öhdəliyinə "sədaqətini" dilə gətirərək, Birləşmiş Ştatların "ilk növbədə NATO müttəfiqləri" ilə tərəfdaşlıq münasibətlərini bərpa etmək istədiyini deyib.
Blinken NATO-ya üzv olan ölkələrin nazirləri ilə keçiriləcək görüşdən əvvəl Brüsseldə NATO-nun baş katibi Yens Stoltenberqlə danışıqlardan öncə onunla birlikdə jurnalistlərin suallarınıı cavablandırıb.
Stoltenberq ABŞ-ın yeni administrasiyasının bu yanaşmasını aıqışladığını bildirərək, "trans-Atlantik münasibətlərdə yeni bir fəsil başlamaq üçün unikal bir fürsətin olduğunu" deyib.
Brüsseldə keçiriləcək iki günlük görüşlər zamanı müzakirə ediləcək əsas mövzulardan biri keçən il Əfqanıstanın Taliban qruplaşması ilə ABŞ-ın keçmiş prezidenti Donald Tramp arasında əldə edilmiş razılığa əsasən, ABŞ əsgərlərinin ölkədən bütünlüklə çıxarılması üçün mayın 1-nə qədər qoyulan son möhlət yaxınlaşdıqca NATO-nun Əfqanıstanda missiyası ilə bağlıdır.
NATO-nun baş katibi Yens Stoltenberq
Blinken vəziyyətin nəzərdən keçirildiyini və Brüsseldəki işinin bir hissəsinin həm ABŞ-ın fikirlərini bölüşmək, həm də NATO müttəfiqlərini dinləmək olacağını deyib. Onun sözlərinə görə, ABŞ-ın qərarı nə olursa olsun, atılacaq addımlar hərbi missiyada iştirak edən digər üzv ölkələrlə əlaqələndiriləcək.
"Birlikdə daxil olduq, birlikdə idarə etdik və vaxtı gələndə birlikdə çıxacağıq" -deyə, Blinken bildirib.
Stoltenberq sülh səylərini alqışladığını deyib və bunun “Əfqanıstanda davamlı siyasi həllin yeganə yolu” olduğunu vurğulayıb. Lakin NATO-nun baş katibi sülhün əldə edilməsi üçün bütün tərəflərin danışıqları xoş niyyətlə aparmalı olduqlarını, zorakılıqların azalmalı və Talibanın Əl-Qaidə kimi beynəlxalq terrorçuları dəstəkləməyi dayandırmalı olduğunu bildirib.