Bu ilin avqustunda paytaxt Bakının istehlak bazarında ərzaq məhsullarının qiyməti 4,9% artıb. Turan agentliyinin məlumatına görə, son bir ayda ərzaq məhsullarının qiymətlərindən, mal əti-21,4%, qoyun əti-12,5%, toyuq əti-2,9%, kərə yağı-3,2%, yumurta-33,3%, şəkər -15,4% artıb. Digər ərzaq məhsullarının qiymətləri isə dəyişməz qalıb. Respublikanın digər iri şəhərlərindən Naxçıvanda-3%, Gəncədə-3,3%, Lənkəranda-3,6%, Mingəçevirdə-3,7%, Qubada isə -3,4% bahalaşma qeydə alınıb. Mövsümlə əlaqədar olaraq son bir ayda paytaxtda və respublikanın digər iri şəhərlərində kənd təssərrüfatı məhsullarının qiyməti də orta hesabla, 15-20% bahalaşıb.
Ekspertlər son aylarda mövcüd olan qiymət artımını obyektiv amillərdən daha çox, süni qiymət artımı, süni infilyasiya, inhisarçılıq və hökumətin istehlak bazarına laqeyd münasibəti kimi subyektiv amillərlə əlaqələndirir. Yaxın günlərdə ərzaq məhsulları qiymətlərinin nisbətən sabit və bahalaşmağa meyilli olacağı da proqnozlaşdırılır.
Azərbaycan kənd təsərrüfatı nazirinin müavini Bəhram Əliyev hesab edir ki, ət və yumurtanın qiymətinin bahalaşması üçün əsas yoxdur. “Bu məhsullara təlabat daxili istehsal hesabına tamamilə ödənilir”.
Onun sözlərinə görə, hazırda əhalinin ətə olan tələbatı 340 min ton təşkil edir və bunun 85%-i daxili bazar hesabına ödənilir.
Cənab Əliyevin fikrincə, qiymət artımı işbazların fəaliyyətinin nəticəsidir. "Belə hallara son qoyulmalıdır və İqtisadi İnkişaf Nazirliyinin əməkdaşları artıq bununla məşğul olur".
O, həmçinin deyib ki, Kənd Təsərrüfatı Nazirliyi problemin həlli üçün yarmarkalar təşkil edir, burada kənd təsərrüfatı məhsulları fermerlərin özləri tərəfindən satılır və qiymətlər bazar qiymətindən 25% ucuzdur.
İqtisadçı Rövşən Ağayev hesab edir ki, respublikanın ət və yumurtaya olan tələbatı daxili vəsait hesabına ödənmir. Hazırda əhalinin ətə olan tələbatını daxili bazar hesabına ödəmək mümkün deyil. Ümumdünya Səhiyyə Təşkilatının (ÜST) məlumatına əsasən, adambaşına ət və ət məhsulları istehlakı orta hesabla ildə 70,7 kiloqram təşkil etməlidir. Bir halda ki, Azərbaycan Nazirlər Kabinetinin normativlərinə görə, bu göstərici ildə 24,7 kiloqram və ya ümumilikdə 220 min ton təşkil edir. Bu, dünya standartından demək olar ki, üç dəfə azdır.
Rövşən Ağayev hesab edir ki, hazırda bazar tamamilə ət idxalından asılıdır və son zamanlar bu məhsulun qiymətinin artması məhz bununla bağlıdır.