“Azərbaycanda sənaye, tikinti, xidmət, rabitə, ticarət, nəqliyyat, kənd təsərrüfatı sahələrində 700-dən çox İran şirkəti qeydiyyatdan keçib. Ölkələrimiz arasında ticarət dövriyyəsi 2017-ci ildə 16, 2018-ci ilin yanvar-sentyabr aylarında isə 73 faiz artıb.”
Bu barədə İranda səfərdə olan Azərbaycanın iqtisadiyyat naziri Şahin Mustafayev İranın yollar və şəhərsalma naziri Məhəmməd Eslami ilə görüşündə bildirib.
Azərbaycan İqtisadiyyat Nazirliyinin mətbuat xidmətinin məlumatına görə, görüşdə iqtisadi-ticarət əlaqələrinə, nəqliyyat-tranzit sahəsində əməkdaşlığın genişləndirilməsinə, Şimal-Cənub Beynəlxalq Nəqliyyat Dəhlizinin inkişafına dair müzakirələr aparılıb.
Azərbaycanla İran arasında ticarət dövriyyəsi 2017-ci ildə 16, 2018-ci ilin yanvar-sentyabr aylarında isə 73 faiz artıb.Şahin Mustafayev
Nazir Mustafayev İran nümayəndə heyəti ilə birgə Astara yükaşırma terminalının tikintisinin gedişi ilə tanış olub, Astaraçay çayı üzərində yeni körpünün inşa olunacağı əraziyə baxış keçirib.
Astara yükaşırma terminalı 35 hektar sahədə yerləşir və tikinti işləri iki mərhələ üzrə həyata keçirilir.
“Artıq birinci mərhələ üzrə Astaraçayla Kəmərbəndi körpüsü arasında 1400 metrlik dəmir yolunun, Bağçasaray körpüsünün, eləcə də Kəmərbəndi körpüsünün Ərdəbil və Rəşt istiqamətində 1440 metr uzunluğunda avtomobil yolunun tikintisi tamamlanaraq istifadəyə verilib”, nazirliyin məlumatında vurğulanır.
Tikinti-quraşdırma işlərinin 2020-ci ilin 1-ci rübünün sonunadək başa çatdırılması nəzərdə tutulur.
Sonra Azərbaycan və İran nümayəndə heyətləri Astaraçay çayı üzərində yeni körpünün tikiləcəyi əraziyə baxış keçirib. Körpünün uzunluğu 100 metr, eni 18 metrə yaxın olmalıdır.
Qəzvin-Rəşt-Astara dəmiryolu
Astaraçay Azərbaycan və İran sərhədindən kleçir.
Astara terminalı İranın Astara şəhərində 35 hektar ərazidə yerləşir. O, Azərbaycan-İran sərhədindən 1.4 km aralıdadır. Azərbaycan və İran arasında razılaşmaya əsasən, 2017-ci ildə terminalın inşasına start verilib. Bundan əvvəl bildirildiyinə görə, tikintisini “Azərbaycan Dəmir Yolları” Qapalı Səhmdar Cəmiyyətinin apardığı Astara terminalı 25 il müddətinə Azərbaycana icarəyə verilib.
"Şimal-Cənub" Beynəlxalq Nəqliyyat Dəhlizi Şimali Avropanı Cənub-Şərqi Asiya ilə birləşdirir.
2000-ci il sentyabrın 12-də Rusiya, İran və Hindistan arasında imzalanmış hökumətlərarası saziş əsasında "Şimal-Cənub" Nəqliyyat Dəhlizinin təməli qoyulub. Azərbaycan bu sazişə 2005-ci ildə qoşulub.