Yəmənin böyük hissəsini nəzarətdə saxlayan Husilər hərəkatı tərəfindən idarə olunan əsas televiziya xəbər orqanı Al Masirah TV-nin və sakinlərin verdiyi məlumata görə, cümə günü paytaxt Səna və Hudeydə hava limanı da daxil olmaqla, Yəmənin bir neçə bölgəsinə hava hücumları keçirilib.
Kanal əlavə edib ki, zərbələr Damar şəhərinin cənubunu da hədəf alıb.
Al Masirah telekanalı zərbələrin ABŞ və Britaniya qüvvələri tərəfindən həyata keçirildiyini bildirsə də, Britaniya hökumətindəki mənbə Britaniyanın bu işdə iştirak etmədiyini bildirib.
İranla müttəfiq olan Husi militantları İsrailin HƏMAS-la müharibəsində fələstinlilərlə həmrəylik məqsədilə keçən noyabr ayından Yəmən yaxınlığında beynəlxalq gəmilərə hücumlara başlayıb.
Husilərin hücumları ABŞ və Britaniyanın cavab zərbələri ilə nəticələnib və dünya ticarətini pozub. Belə ki, gəmi sahibləri Qırmızı dəniz və Süveyş kanalından uzaqlaşaraq Afrikanın cənubunda daha uzun marşrutla üzməli olub.