Bir neçə il əvvəl Dünya Ana Dili Günü münasibəti ilə İran Azərbaycanında keçirilən tədbirlərə qatıldıqları zaman nəzarət altına alınmış onlarla dil haqları müdafiəçiləri Əhər Məhkəməsində kütləvi şəkildə mühakimə ediliblər.
Güneylə bağlı xəbər yayan internet portalları, həmçinin Amerikanın Səsinin mühakimə edilənlərdən əldə etdiyi məlumata görə, Əhər məhkəməsi fəalların bir hissəsini “təhlükəsizliyi pozmaq məqsədi ilə rejimə muxalif qruplaşmaları təsis və idarə etmək” ittihamı, bir qismini isə bu qruplaşmalara üzv olmaqda günahlandırır.
Əhərdə mühakimə olunan fəallardan Abbas Lisani, Rəhim Qulami, Əsgər Əkbərzadə, Məhəmməd Rəhmanifər, Meysəm Azadi, Mənsur Seyfi, Əkbər Əbulzadə, Cəlal Durudgəri, Vəhid Faizpur, Şapur Nüsrətpur, Meysəm Colani, İbrahim Nuri, Əlirza Çəngizi, İsrafil Fətullazadə, Vahid Bəstami, Süleyman Kazımi, Mehdi Zincirbulaği, Beytullah Bərzgər, Murtaza Səfəri, Arəş Cəfəri, Əkbər Cahangiri, Murtaza Şükri, Hamid Allahverdi, Murtaza Məhəmmədi və Məcid Nağızadənin adları məlum olub.
Bu məlumata görə, bu fəalların bir çoxu müdafiələrini yazılı olaraq türk dilində məhkəməyə təqdim ediblər.
Bu fəalların bir neçəsi həmçinin 2015-ci il noyabrın 9-da keçirilən kütləvi etirazlar və Uyğur türklərinə dəstək mitinqlərinə qatıldıqları üçün mühakimə edilirlər.