Həbsdə olan jurnalist Əfqan Sadıqov 28-ci gündür aclıq edir və o Kürdəxanıda kritik durumdadır.
Bu barədə Amerikanın Səsinə jurnalistin həyat yoldaşı Sevinc Sadıqova bildirib.
Onun sözlərinə görə, Əfqan Sadıqovla görüşə getsə də, onunla görüşə bilməyib.
Your browser doesn’t support HTML5
Sevinc Sadıqova: Əgər Əfqan Sadıqov ölərsə...
“Anası ilə Kürdəxanıya getdik görüşə. Vəziyyəti o qədər ağırdır ki, görüşə çıxa bilməyib. Hal-hazırda Əfqan Sadıqov Kürdəxanıda canıyla əlləşir. O, ölüm ayağındadır. Bu hakimiyyətdə olanlar, bu ölkənin rəhbəri əgər Əfqan Sadıqov ölərsə cavab verə biləcəkmi? Əfqan Sadıqovun ölümü bu hakimiyyətə, vətənə nə verəcək?" o qeyd edib.
Sevinc Sadıqova deyir ki, heç bir aidiyyatı qurum Əfqan Sadıqovun vəziyyəti ilə bağlı rəsmi açıqlama vermir.
“Əfqan Sadıqov öləcəksə, onun başına bir iş gələcəksə, mən Azərbaycan vətəndaşlığından imtina edəcəm. Ölkəni bu hala salan məmurlara nifrət edəcəm,” o qeyd edib.
Jurnalistin aclıq aksiyası ilə bağlı Penitensiar Xidmətdən hələ şərh almaq mümkün olmayıb.
Amma bir neçə gün əvvəl Penitensiar Xidmətin mətbuat xidmətindən cəzaçəkmə müəssisələrində aclıq edən məhbusun olmadığını bildiriblər.
Noyabrın 3-də Bakı Ağır Cinayətlər Məhkəməsi Azel.tv saytının redaktorunu hədələmə yolu ilə pul tələb etmə ittihamı ilə günahkar sayaraq yeddi il müddətinə azadlıqdan məhrum edib.
“Mən məhkəmənin hökmünü ədalətsiz hesab edirəm. Ortada heç bir hədə-qorxu, şantaj xarakterli yazı yoxdur. Bu səbəbdən aclığa başlayıram. Ədalət bərpa edilməsə aclığın 20-ci günündən sonra quru aclığa keçəcəm,” jurnalist məhkəmədə deyib.
Əfqan Sadıqov mayın 13-də saxlanılıb və Binəqədi Rayon Məhkəməsi onun barəsində həbs qətimkan tədbiri seçib.
İstintaqın iddiasına görə, Sadıqov xeberfakt.az nəşrinin redaktoru Sakit Muradovla birlikdə 10,000 manat rüşvət alarkən saxlanılıb. Bu zaman Muradovu həbs etməyiblər.
Əfqan Sadıqov həbsindən öncə “Taxtakörpüdə gizlədilmiş cinayət hadisəsi“ adlı məqalə ilə çıxış edib. Məqalədə Taxtakörpü qəsəbəsində kimsəsiz və köməksiz olan iki qadına qarşı (onlardan biri azyaşlıdır) cinsi zorakılıqdan bəhs edilir. Jurnalist qadınlara qarşı zorakılığın araşdırılmamasından narahatlığını bildirib. O həmin məlumatı YouTube kanalı vasitəsilə də diqqətə çatdırıb.
Sadıqov həmçinin narkotik qaçaqmalçılığında əli olduğunu iddia etdiyi bir qrup şəxs və Sumqayıt şəhər İcra Hakimiyyətinin vəzifəli şəxsləri barədə də tənqidi məqalələrlə çıxış edib.
“Yüksək vəzifəli bir neçə məmuru kəskin tənqid, ifşa etdiyim üçün sifarişin, tapşırıq, göstərişin hardan gəldiyini yaxşı bilirik,” Sadıqov həbsindən öncə Facebook səhifəsində yazıb.
Bir çox yerli və beynəlxalq hüquq müdafiə təşkilatları, o cümlədən Jurnalistləri Müdafiə Komitəsi Azərbaycan hökumətini jurnalistin dərhal azadlığa buraxılmasına çağıran bəyanatlarla çıxış edib.