“Yeni Azərbaycan partiyası beş il ərzində həyata
keçirilən siyasi xəttin davam etdirilməsi mövqeyindən çıxış edir. Beş il ərzində prezident İlham
Əliyevin rəhbərliyi altında həyata keçirilən siyasətin əsas qayəsi Azərbaycanı
qüdrətli dövlətə çevirmək, Azərbaycan cəmiyyətini müasirləşdirmək və hər bir vətəndaşa
layiqli həyat təmin etmək şüarları üzərində qurulub. Bu barədə “Yeni Azərbaycan”
partiyasının sədr müavini, prezidentliyə namizəd, hazırkı prezident İlham Əliyevin səlahiyyətli nümayəndəsi
Əli Əhmədov “Amerikanın səsi” radiosuna müsahibəsində bildirib. Onun sözlərinə görə, növbəti
beş il üçün cənab Əliyevin başlıca seçki şüarı “İlhamla irəli!” tezisində əksini
tapır. “Bu tezisin irəli sürülməsi ötən beş ildə həyata keçirilən siyasətin sürət
və vüsətlə yeni şəraitdə reallaşdırılmasını nəzərdə tutur. Beləliklə də prezident
İlham Əliyevin Azərbaycanı gücləndirmək və qüdrətləndirmək xətti həyata keçiriləcək
və iqtisadiyyatın yüksəlməsi zəminində vətəndaşların zəngin həyatının təmin
edilməsi xətti yeridiləcək”. Cənab Əhmədov İlham Əliyevin xarici siyasət
kursununda bundan öncəki beş il ərzində yeridilən kurs olacağını deyib. “Bu xarici siyasət xətti Azərbaycanın beynəlxalq mövqelərinin möhkəmləndirilməsinə
gətirib çıxardı. Eyni zamanda, dəyişən dünyanın inkişaf meyllərinə uyğun şəkildə
xarici siyasət xəttində müəyyən yeni nüansların ortaya çıxacağını da nəzərə
almaq lazımdır. Bu hər şeydən öncə Dağlıq Qarabağ münaqişəsinin nizamlanması ilə
bağlı regionda yaranmış şəraitin ortaya çıxardığı yeni reallıqların nəzərə
alınmasıdır”. Səlahiyyətli nümayəndə
İlham Əliyevin xarici siyasət konsepsiyasında
qonşu dövlətlərlə mehriban münasibətlərin əsas yer aldığını bildirib. “Digər
tərəfdən Azərbaycan çox müxtəlif siyasi qütblərdə duran ölkələrlə qonşudur. Bununla
belə, Azərbaycan normal qonşuluq münasibətlərini davam etdirmək niyyətindədir”. Onun dediyinə görə, Azərbaycan
qərbə, müasir dünyaya inteqrasiya xəttini bundan sonra daha qətiyyətlə, daha səylə
davam etdirəcək. “Biz qəti şəkildə etiraf edirik ki, Azərbaycanın gələcəyi
dünya birliyinə sürətlə inteqrasiyadadır.
Dünya birliyinin əsas dəyərləri də qərb
dəyərləri üzərində kökləndiyindən təbii ki, Azərbaycanın növbəti beş ildə
də bu istiqamətdə xarici siyasət yeritməsi özünü göstərəcək”. Cənab Əhmədov YAP-ın namizədinin
daxili siyasətdə iki fundamental prinsipi əsas tutduğunu deyib. “Azərbaycanın
qarşısına qoyduğu ideyaların yerinə yetirilməsi dayanıqlı və möhkəm vətəndaş
birliyi və həmrəyliyindən asılıdır. Azərbaycançılıq ideyası zəminində bu
prinsipin həyata keçirilməsi daxili siyasətdə bundan sonra da üstünlük təşkil
edəcək. Digər fundamental prinsip isə demokratiya və plüralizmin vətəndaş cəmiyyəti
ideyasının daha da möhkəmləndirilməsidir. Bu isə öz növbəsində ölkəmizdə sağlam
əsaslarla fəaliyyət göstərən demokratiyanın, fikir plüralizminin çoxluğunu nəzərdə
tutur”. O müxalifət düşərgəsinin parçalanmasından təəssüfləndiyini bildirib. “Bu
Azərbaycanın demokratik inkişafına əngəl törədən gerçəkliklərdən biridir. Azərbaycan
hakimiyyəti və “Yeni Azərbaycan” partiyası olaraq biz, sağlam demokratik qüvvələrin
sağlam ideyalar və müxalifətçilik prinsipləri əsasında formalaşmasını nəzərdə
tuturuq. Növbəti beş ildə yeni müxalifətçilik ideyası daxili-siyasi proseslərdə
əhəmiyyətli yerini tutacaq”. YAP sədrinin müavini müxalifətin
seçkiləri boykot bəyanatlarına da münasibət bildirib. “Bir sıra müxalifət nümayəndələri
seçkilərdə iştirak edir. Digər bir həqiqət ondan ibarətdir ki, bir sıra müxalıfət
partiyalarının nümayəndələri qarşıdan gələn
prezident seçkilərində iştirakdan imtina edib. Onlar seçkilərdə iştirak etmədiklərinin
həqiqi səbəbini gizlədərək, bunu seçkilərin boykot edilməsi kimi cəmiyyətə təqdim
edir. Əlbəttə səmimi olardı ki, seçkilərə
qatılmaq iqtidarında olmayan müxalifət partiyaları bunun həqiqi, real səbəblərini
cəmiyyətə açıq şəkildə etiraf edəydilər. Amma təəssüf ki, onlar yenə həqiqi
olmayan və yenə Azərbaycanın maraqlarına xidmət etməyən bir yolu seçib”. O seçkilərdə İlham Əliyevin
kifayət qədər çox səs toplaya biləcəyinə əmindir. “Bunu Azərbaycan cəmiyyətinin
ovqatı, əhali və seçicilər arasında dəfələrlə keçirilən sosioloji sorğuların nəticələri
də birmənalı şəkildə təsdiqləyir”.
