BMT-nin İnsan Haqları Komitəsinin Azərbaycana dair iyulun 31-də açıqlaması gözlənilən hesabatı çox tənqidi və sərt ola bilər. Bu sözləri iyulun 21-i və 22-də Cenevrədə “Azərbaycanda nə baş verir?” sualına cavab tapmaq üçün keçirilən görüş zamanı BMT rəsmiləri və diplomatları deyib.
Reuters xəbər agentliyinin məlumatına görə, ziyalılar və qanunvericilərdən ibarət olan 18 üzvlü komitədən təşkil olunmuş heyət Azərbaycan hökumət rəsmilərini sorğu suala çəkib.
“Bu həftə komitə üzvlərinin açıqlamalarından sonra aydındır ki, müstəqil jurnalistlərə hücumlar, ifadə azadlığı və məhkəmələrə dövlət nəzarəti səbəbilə onlar ciddi addımlar atmağa hazırlaşırlar”-deyə adının çəkilməsini istəməyən rəsmi bildirib.
Azərbaycan nümayəndə heyətinə başçılıq edən xarici işlər nazirinin müavini Xələf Xələfov komitə qarşısında çıxışında bildirib ki, jurnalistlər yalnız qanunu pozduqlarına görə həbs olunublar. Komitə üzvlərindən biri isə deyib ki, cənab Xələfovun ölkəsi polis zorakılığını rədd etməyə adətkar olub.
Qeyd edək ki, komitə sessiyası Avropa Birliyindən olan yüksək vəzifəli nümayəndə heyətinin müşayiəti ilə keçirilib. Sessiyada birliklə xüsusilə enerji sektorunda iqtisadi əməkdaşlığın inkişafına çalışan Azərbaycanda insan haqlarının vəziyyətinə dair xəbərdarlıq verilib.