Ağ Evin mətbuat xidmətinin yaydığı bəyanata
görə, ABŞ, Rusiya və Fransa Böyük Səkkizliyin sammiti zamanı Dağlıq Qarabağ
münaqişəsinin nizamlanmasına dair baza prinsiplərinin yekunlaşdırılmasında Azərbaycan
və Ermənistan prezidentlərinə dəstək verdiklərini bir daha təkrar edib.
Bəyanatda bildirilir ki, Minsk qrupuna üzv ölkələrin prezidentləri Barak Obama, Dmitri Medvedyev və Nikola Sarkozi
2007-ci il Madrid sənədinin yeni versiyasının təqdim edilməsi barədə vasitəçilərinə
göstəriş verdiklərini bildirib. Ağ Evin bəyanatında deyilir ki, baza prinsipləri Helsinki Yekun Sənədinin gücdən istifadə edilməməsi, ərazi bütövlüyü, xalqların bərabər hüquqlu olması və öz müqəddəratlarını təyin etməsi prinsiplərinə əsaslanan məntiqli bir kompramizi əks etdirir.
Hər üç ölkənin dövlət başçısı Ermənistan və Azərbaycan prezidentlərini aralarındakı bir neçə fikir
ayrılığının aradan qaldırılmasına və münaqişənin
həllini nəzərdə tutan baza prinsiplərinə dair razılığın yekunlaşdırılmasına
çağırıb.
Ermənistan və Azərbaycana təqdim edilən baza prinsiplərinə dair razılıq 2007-ci ilin noyabr ayında ABŞ, Fransa və Rusiyanın xarici işlər nazirləri tərəfindən Madriddə əldə edilmişdi.
Baza prinsiplərinə Dağlıq Qarabağ ətrafındakı ərazilərin Azərbaycana qaytarılması, təhlükəsizlik və özünüidarə təzminatı ilə Dağlıq Qarabağın müvvəqqəti statusunun müəyyənləşdirilməsi, Ermənistanla Dağlıq Qarabağ arasında dəhliz yaradılması, xalqın iradəsi ilə Dağlıq Qarabağa yekun hüquqi status verilməsi, məcburi köçkünlər və qaçqınların geri qaytarılması, habelə beynəlxalq sülhməramlı qüvvələrin münaqişə zonasına yerləşdirilməsi daxildir.
Baza prinsiplərinin Ermənistan və Azərbaycan tərəfindən təsdiq edilməsi bu iki ölkə və onların sərhəd regionlarının sülh, sabitlik və rifahını təminat altına almalıdır.