Yanvarın 8-də Səbail Rayon Məhkəməsində "Kanal 13" televiziyasının rəhbəri Əziz Orucovun cinayət işi üzrə məhkəmə iclası keçirilib.
İclas zamanı Orucovun vəkilləri onun barəsində həbs qətimkan tədbirinin ev dustaqlığı ilə əvəz edilməsinə dair vəsatət qaldırıblar. Vəkil Fəxrəddin Mehdiyevin sözlərinə görə, vəsatət təmin edilməyib.
"O heç bir ictimai təhlükəli əmələ yol verməyib. Özünə, ailəsi ev tikib, məlum olduğu kimi çoxsaylı ev tikilililəri var. Normal qaydada torpaq ala bilmədiyinə görə o, özünə ev inşa edib. Burada da kiməsə zərər
Fəxrəddin Mehdiyev
vurmayıb, nə şəxsiyyətə, nə də dövlət maraqlarına zidd hərəkət edib. Ona görə Əziz Orucov özünü təqsirli bilmir", deyə, vəkil qeyd edib.
Məhkəmədə dövlət ittihamçısı ittiham aktını elan edib:
"Biz vəsatət verdik ki, məhkəmə istintaqı zərərçəkmiş şəxsdən başlasın. Məlum oldu ki, məhkəmədə zərərçəkmiş şəxsin nümayəndəsi kimi Əmlak Məsələləri Dövlət Xidmətinin nümayəndəsi iştirak etməli idi, lakin prosesdə nə nümayəndə, nə də şahidlər iştirak edirdi. Bununla əlaqədar məhkəmə onların da iştirakını təmin etmək üçün prosesi təxirə saldı".
Növbəti məhkəmə prosesi yanvarın 24-də olacaq.
Əziz Orucov 27 noyabr 2023-cü ildə özbaşına tikinti ittihamı ilə saxlanılıb. Sonradan ona Cinayət Məcəlləsinin 206.3.2-ci (qaçaqmalçılıq, bir qrup şəxs tərəfindən qabaqcadan əlbir olaraq törədildikdə) maddəsilə ittiham verilib.
Lakin ibtidai istintaqın nəticələrinə əsasən qaçaqmalçılıq ittihamı ləğv edilib.
İş məhkəməyə Cinayət Məcəlləsinin 188.2-ci (torpaq üzərində mülkiyyət, istifadə və ya icarə hüququnu pozma) maddəsi üzrə verilib.
Əziz Orucov ittihamları rədd edir və jurnalist fəaliyyətinə görə həbs olunduğunu deyir.
Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edirlər.