İsrail ordusunun şənbə günü verdiyi məlumata görə, Yəməndən atılan raket Tel-Əvivin bir sahəsini vurub və yaxınlıqdakı pəncərələrdən qırılan şüşələrdən 16 nəfər yüngül yaralanıb.
Ordunun bildirdiyinə görə, daha 14 nəfər raket havada olarkən hava hücumu siqnallarını eşidib, sığınacaqlara qaçarkən xəsarət alıb.
Husilər Telegram kanallarında adını açıqlamadıqları hərbi hədəfə hipersonik ballistik raketlə zərbə endirdiklərini bildirdilər.
Hücum İsrailin Yəmənin Husi üsyançıların nəzarətində olan paytaxtı Səna və Hüdeydə liman şəhərinə havadan bir neçə zərbə endirməsindən iki gün sonra baş verib. İsrailin bu zərbələri Husilərin uzunmənzilli raketlə İsraildəki bir məktəb binasını hədəf almasına cavab olaraq həyata keçirilib. Husilər həmçinin, cümə günü İsrailin mərkəzi bölgəsində müəyyən edilməyən bir hərbi hədəfi vuran bir dron hücumu təşkil etdiklərini iddia ediblər.
İsrail ordusu İranın dəstəklədiyi Husilərin, İsrail-HƏMAS müharibəsi dövründə Qəzzada 200-dən çox raket və dron buraxdığını bildirir. Husilər həmçinin, Qırmızı Dəniz və Aden Körfəzində gəmiçilik fəaliyyətlərinə hücum edirlər. Bu hücumların Qəzzada atəşkəsə qədər dayandırılmayacağı bildirilir.
İsrailin cümə günü həyata keçirdiyi zərbələr BMT-nin sözçüsü Stefane Dujarrikin dediyinə görə, Husilərin nəzarətində olan Qırmızı Dəniz limanlarında "böyük ziyan" vurub və "liman tutumunda dərhal və əhəmiyyətli azalma"ya səbəb olacaq. Hüdeydə limanı, Yəməndəki on illik vətəndaş müharibəsi zamanı ölkəyə ərzaq göndərilməsi üçün əhəmiyyətli olub.
BMT-nin Baş Katibi Antonio Guterres, hər iki tərəfin hücumlarının bölgədə daha da gərginləşməyə səbəb olduğunu və BMT-nin vasitəçilik səylərini zəiflətdiyini bildirib.