ABŞ-ın yeni seçilmiş prezidenti Donald Tramp cümə axşamı verdiyi açıqlamada hedc fondu meneceri Skot Bessenti öz administrasiyasında maliyyə naziri kimi görmək istədiyini açıqlayıb.
62 yaşlı Bessent “Key Square Capital Management” hedc fondunun təsisçisidir. O, 1991-ci ildən bəri müxtəlif zamanlarda “Soros Fund Management”-də çalışıb. Bessent büdcə kəsiri ilə mübarizə aparacağını və ABŞ-ın milli borcunun azaldılması üzərində çalışacağını söyləyib.
Milyarder Bessent keçmişdə demokratlar tərəfdarı olsa da, daha sonra Trampın güclü dəstəkçisinə çevrilib.
O, Trampın vergilərin azaldılması siyasətinin genişləndirilməsi planını dəstəkləyir və Trampın ikinci administrasiyası dövründə tətbiq ediləcək tariflərin ilk növbədə Çinə istiqamətləndiriləcəyini bildirib.
Tramp həmçinin cümə günü axşam yüksək vəzifələrə daha bir neçə namizəd irəli sürüb.
Yeni seçilmiş prezident, Rassel Turlou Voutu İdarəetmə və Büdcə Ofisinin direktoru vəzifəsində görmək istədiyini bildirib. Vout Trampın ilk administrasiyasında eyni vəzifədə çalışıb.
Tramp həmçinin əmək katibi olmaq üçün ABŞ Nümayəndələr Palatasının Oreqon ştatından olan nümayəndəsi Lori Çavez-DeRemeri seçib. DeRemeri son seçkilərdə Nümayəndələr Palatasındakı yerini itirib.
Cümə gecəsi Trampın Nazirlər Kabinetində son seçimi Mənzil və Şəhər İnkişafı vəzifəsini yerinə yetirmək üçün Skot Törner idi. Törner Trampın ilk administrasiyasında Ağ Evdə çalışmış keçmiş futbolçudur.
Milli təhlükəsizlik sahəsində Tramp cümə günü axşam Dövlət Departamentinin keçmiş rəsmisi Aleks Vonqu milli təhlükəsizlik müşavirinin müavini vəzifəsinə seçdiyini açıqladı. Tramp açıqlamasında bildirib ki, ilk administrasiyası dövründə Şimali Koreya üzrə xüsusi nümayəndənin müavini vəzifəsində çalışmış Vonq “Şimali Koreya lideri Kim Conq Unla zirvə görüşümlə bağlı danışıqlara kömək edib”.
Tramp həmçinin Ağ Evin terrorla mübarizə üzrə baş direktoru vəzifəsinə mühafizəkar şərhçi Sebastian Qorkanı seçib və onun milli təhlükəsizlik sahəsində 30 ildən çox təcrübəyə malik olduğunu deyib.