Ukrayna Azərbaycanı Rusiyanın Kimyəvi Silahların Qadağan Edilməsi Təşkilatının İcraiyyə Şurasına üzv seçilməsinə səs verməməyə çağırır.
Ukraynanın Azərbaycandakı səfiri Yuriy Husyevin Kimyəvi Silahların Qadağan Edilməsi Təşkilatının İcraiyyə Şurasının yeni üzvlərinin seçilməsi ilə bağlı şərhində deyilir ki, Ukrayna Kimyəvi Silahlar Konvensiyasına (CWC) üzv olan bütün dövlətləri, xüsusən də Azərbaycan Respublikasını Kimyəvi Silahların Qadağan Edilməsi Təşkilatı (OPCW) İcra Şurasına seçkilərə məsuliyyətlə yanaşmağa çağırır.
“Çexiya və Şimali Makedoniyaya dəstək beynəlxalq ictimaiyyətin təcavüzə və beynəlxalq hüququn pozulmasına qarşı durmağa hazır olduğuna aydın siqnal verəcək”, o qeyd edib.
25-29 noyabrda Haaqa şəhərində Kimyəvi Silahlar Konvensiyasına üzv olan Dövlətlərin Konfransının 29-cu sessiyası keçiriləcək. Əsas məsələlərdən biri Şərqi Avropa Qrupundan 2025-2027-ci illər üçün Kimyəvi Silahların Qadağan Edilməsi Təşkilatının İcraiyyə Şurasına iki yeni üzvün seçilməsi olacaq. Üzvlüyə Çexiya, Şimali Makedoniya və Rusiya namizədliyini irəli sürüb.
Səfir Husyev bildirib ki, kimyəvi silahsız dünyanın gələcəyi birgə fəaliyyət və həmrəylikdən asılıdır.
“Beynəlxalq hüquqa hörmət edən namizədlərə səs vermək növbəti illərdə beynəlxalq arenada sabitliyin və təhlükəsizliyin təmin olunmasına kömək edəcək”, o qeyd edib.
Ukraynanın Azərbaycandakı səfirliyinin məlumatında deyilir ki, Ukrayna CWC-yə üzv dövlətlərin konfransının 29-cu sessiyasında məsuliyyətli seçimlərə çağırır.
“Ukrayna beynəlxalq hüququ sistematik şəkildə pozduğuna və Rusiya Federasiyasının Ukraynaya qarşı təcavüzkar müharibəsinin bir hissəsi kimi kimyəvi silahdan istifadə etdiyinə görə Rusiyanın OPCW-nin rəhbər orqanlarına seçilməsinin qəti əleyhinədir. 2018-ci ildə Solsberidə Sergey və Yuliya Skripalların, 2020-ci ildə Aleksey Navalnının zəhərlənməsi kimi insidentlərdə "Noviçok"un sinir qıcıqlandırıcılarından istifadə edildiyi rəsmən təsdiqlənib. Rusiya Ukraynaya qarşı təcavüzü zamanı da qadağan olunmuş kimyəvi maddələrdən istifadə etməkdə davam edir. Sənədləşdirilmiş hallara Ukrayna Təhlükəsizlik və Müdafiə Qüvvələrinə qarşı xloropikrin və digər zəhərli maddələrin istifadəsi, CWC-nin müharibə üçün kimyəvi maddələrin istifadəsini qadağan edən birinci maddəsinin birbaşa pozulmasıdır”, məlumatda qeyd edilir.
Ukrayna səfirliyi həmçinin bildirir ki, 2023-cü ilin fevralından 2024-cü ilin oktyabrına qədər Ukraynada tərkibində təhlükəli kimyəvi maddələr olan döyüş sursatının Rusiya tərəfindən istifadəsi ilə bağlı 4300-dən çox hadisə qeydə alınıb.
“Bundan əlavə, beynəlxalq ictimaiyyət Rusiyanın Ukraynadakı hərəkətlərini dəfələrlə pisləyib. Böyük Britaniya və ABŞ CWC qaydalarını pozduğuna görə Rusiyanın radiasiya, kimyəvi və bioloji müdafiə bölmələrinə qarşı sanksiyalar tətbiq edib. Bu, bir daha təsdiqləyir ki, Rusiyanın kimyəvi silahdan azad dünyanı təmin etmək məqsədi daşıyan beynəlxalq təşkilatların rəhbər orqanlarında hər hansı vəzifə tutmağa mənəvi haqqı yoxdur”, Ukrayna səfirliyinin məlumatında deyilir.
Azərbaycan Respublikası 1993-cü ilin 13 yanvar tarixində Kimyəvi Silahlar Konvensiyasını ilk imzalayan dövlətlərdən biri olub. Konvensiya 2000-ci ilin 29 fevral tarixində Azərbaycan Milli Məclisi tərəfindən ratifikasiya olunub.