Ukraynanın Mikolaiv regionunda rəsmilər çərşənbə axşamı deyib ki, Rusiyanın raket hücumu azı bir nəfərin ölümü, 16 nəfərin yaralanması ilə nəticələnib.
Mikolaiv qubernatoru Vitali Kim Telegramda deyib ki, hücum infrastruktur obyektinə, restorana və alış-veriş ərazilərinə, habelə yaşayış binalarına ziyan vurub.
Ukrayna ordusu çərşənbə axşamı bildirib ki, Rusiya gecə hücumlarında 9 raket və 17 drondan istifadə edib, Ukraynanın hava hücumundan müdafiə qüvvələri dronlardan 12-ni vurub.
Ukrayna hava qüvvələri bildirib ki, dronlar Çerkası, Çernihiv, Kirovohrad, Kyiv, Mikolaiv, Odesa və Poltava regionları üzərində vurulub.
Rusiya Müdafiə Nazirliyinin çərşənbə axşamı bildirdiyinə görə, Belqorod, Kursk və Tula bölgələri üzərində Ukraynaya məxsus dronlar məhv edilib.
Belqorod qubernatoru Vyaçeslav Qladkov deyib ki, drondan düşən partlayıcı cihaz yaşayış binasına dəyib və bir nəfəri yaralayıb.
NATO-nun baş katibi bazar ertəsi bildirib ki, alyans Rusiyadan gələn təhdidlərə baxmayaraq, Ukraynanı dəstəkləməyə davam edəcək.
Almaniyanın Viesbaden şəhərində NATO-nun Ukrayna üzrə missiyasında çıxış edən Mark Rutte deyib ki, Rusiya Prezidenti Vladimir Putinə mesaj budur ki, “biz davam edəcəyik, biz onun istədiyini əldə etməməsindən əmin olmaq üçün lazım olanı edəcəyik. Ukrayna qalib gələcək”.
NATO alyansı “dünyanın ən güclü hərbi alyansıdır və 1 milyard insana xidmət edir”, Rutte deyib. “Biz istənilən təhlükəyə qarşı durmağa hazırıq. Biz heç vaxt düşmənlərimizdən qorxmayacağıq”.
Bazar ertəsi Ruttenin NATO-nun Ukraynaya Təhlükəsizlik Yardımı və Təlimi adlı Ukrayna missiyasına ilk səfəri baş tutub. Missiya nəticədə Qərbin Ukraynaya hərbi yardımının koordinasiyasını öz üzərinə götürəcək.
Ukrayna Prezidenti Volodimir Zelenski bazar ertəsi gündəlik müraciətində deyib ki, Xarici Kəşfiyyat Xidməti və Ukrayna Müdafiə Kəşfiyyatı rusların Ukraynaya davam edən hərbi müdaxiləsində “payız və qış üçün niyyətləri” ilə bağlı “kifayət qədər detallı” hesabat hazırlayıb.
Hesabata Şimali Koreyanın müharibədə iştirakı və Rusiyanın “təəssüf ki, müharibənin uzadılmasına sərmayə qoyan” digər ölkələrlə münasibətləri barədə ifşalar yer alıb.
Prezident Zelenski xəbərdarlıq edib ki, “Rusiyaya kim kömək edirsə, biz Ukraynanı müdafiə etmək üçün lazım olan qədər sərt cavab verəcəyik.” O deyib ki, “Rusiyanın niyyətlərinin baş tutmaması üçün tərəfdaşlarımızla müvafiq iş aparılacaq.”
Zelenski əlavə edib ki, bu həftə “Ukrayna Avropadakı bütün tərəfdaşlarımıza Rusiyanı bu müharibəni ədalətli sona çatdırmağa məcbur etmək üçün strategiyamızı təqdim edəcək”.
“Qələbə planı” kimi tanınan strategiya hələ ictimaiyyətə açıqlanmayıb.