Azərbaycan və Ermənistan “Zəngəzur dəhlizi” kimi tanınan, Azərbaycanı eksklavı Naxçıvanla birləşdirəcək nəqliyyat marşrutlarının təşkili məsələsini sülh sazişi layihəsindən çıxararaq sonrakı mərhələdə həll etməyə razılaşıb.
Bu barədə Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Azadlıq radiosuna müsahibəsində bildirib. Rəsmi Yerevan məlumatı təsdiqləyib.
“Biz qarşılıqlı razılaşma əsasında bu bəndi sülh sazişindən çıxarmaq və onun müzakirəsini sonrakı mərhələyə keçirmək qərarına gəldik. Beləliklə, biz onu mətndən çıxarmağa qərar verdik, lakin bunun ölkələrin gələcəkdə müzakirə etmək və ümumi razılığa gəlmək üçün qayıda biləcəyi məsələlərdən biri olması faktını hələ də mətndə əks etdirə bilərik”, səfir Elçin Əmirbəyov vurğulayıb.
Ermənistan Xarici İşlər Nazirliyi Azadlıq radiosunun erməni xidmətinə açıqlamasında məlumatı təsdiqləyib. Nazirliyin sözçüsü Ani Badalyan eyni zamanda marşrutların açılmasının Ermənistanın regionda sülh və iqtisadi inkişafa dair baxışı və gündəliyinin mühüm hissəsi olmaqda davam etdiyini bildirib.
“Bu, suverenlik və yurisdiksiyaya hörmət, eləcə də qarşılıqlıq və bərabərlik kimi tanınmış prinsiplərə əsaslanan ER hökuməti tərəfindən təqdim olunan “Sülh kəsişməsi” proqramında ən yaxşı şəkildə öz əksini tapmışdır”, Badalyan deyib.
Rəsmi Bakı 2020-ci ildə 44 günlük müharibədən sonra Rusiyanın vasitəçiliyi ilə imzalanan Üçtərəfli bəyannaməni əsas gətirərək Azərbaycanın əsas hissəsi ilə Naxçıvanı Ermənistanın cənubundan keçməklə birləşdirəcək Zəngəzur dəhlizinin açılmasında israr edib.
Yerevan isə “dəhliz” termininə qarşı çıxaraq ölkələrin ərazilərindən keçən nəqliyyat xətlərinin həmin ölkələrin yurisdiksiyası altında olmalı olduğunu bildirib. Ermənistan regionda bütün nəqliyyat xətlərinin, o cümlədən Türkiyə ilə sərhədin açılmasının nəzərdə tutulduğu “Sülh kəsişməsi” layihəsini irəli sürüb.