Avqustun 1-də Lənkəran şəhəri ilə ABŞ-ın Monterey şəhəri arasında mövcud olan “qardaşlaşmış şəhərlər” əlaqələri çərçivəsində Lənkəran rayonunun İstisu qəsəbəsində salınmış “Dostluq Parkı”nın açılışının bir iiliyi ilə bağlı tədbir keçirilib.
Tədbirdə Lənkəran Şəhər İcra hakimiyyətinin başçısının müavini Ülviyyə Əliyevaya, ABŞ-ın Azərbaycandakı səfirliyinin ictimai işlər üzrə attaşesi Melissa Şauqnessi, Lənkəran-Monterey Dostluq Assosiasiyasının həmsədri Nensi Selfric və Azərbaycan Diplomatik Akademiyasının müəllimi Şəfəq Mehralıyeva iştirak edib.
Lənkəranda Dostluq Parkı (Mənbə: ABŞ səfirliyi)
Lənkəran İcra Hakimiyyətinin məlumatında deyilir ki, 2011-ci ildən qardaşlaşan Lənkəran-Monterey şəhərləri arasında ötən müddət ərzində qarşılıqlı əlaqələrin hərtərəfli dinamik inkişafı daim diqqət mərkəzində olub, münasibətlərin daha da yaxınlaşması üçün mütəmadi ünsiyyət saxlanılıb.
ABŞ-ın Azərbaycandakı səfirliyi isə bildirir ki, Lənkəranın Kaliforniya ştatının Monterrey şəhəri ilə əməkdaşlıq nəticəsində yaradılan yeni Monterrey Parkının açılışından məmnundurlar.
“Monterrey Parkı nəinki daha çox istirahət imkanları təqdim edir, həm də ABŞ-Azərbaycan dostluğunu və əməkdaşlığı gücləndirir. Daha çox birgə nailiyyətlərə doğru! “ ABŞ səfirliyi qeyd edir.
Lənkəranda Dostluq parkı açılıb (Mənbə: Lənkəran İcra Hakimiyyəti)
2023-cü il avqustun 1-də Azərbaycanın Lənkəran rayonunun İstisu qəsəbəsində (Bakıdan 247 kilometr cənub) Lənkəranın ABŞ-ın Monterey şəhəri ilə qardaşlaşması çərçivəsində salınan Dostluq parkının açılışı olub.
Lənkəran rayonunun İstisu qəsəbəsində Yaşılçay Fermer Təsərrüfatının rəhbəri Araz Yağubova məxsus ümumi sahəsi 5 hektar olan ərazidə salınan Dostluq Parkı iki hissədən, - göl və bağdan ibarətdir. Ərazidə süni göl salınıb, göldə katamaranlar yerləşdirilib, söhbətgahlar tikilib və yaşıllıqlar salınıb. Lənkəran-Monterey Dostluq Asossiasiyasının həmsədri Nensi Selfrij tərəfindən hədiyyə olunan “Cırtdan” heykəli qurulub.