İranın Ali Məhkəməsi Tehranın Evin həbsxanasında həbs cəzasını çəkməkdə olan türk dil haqları müdafiəçisi Mahmud Ocaqlının işinə yenidən baxılması barədə müraciətini təmin etməyib.
İnsan haqları üzrə fəaliyyət göstərən HRA agentliyinin xəbərinə görə, Ocaqlının müraciəti bu yaxınlarda Ali Məhkəmənin 39-cu şöbəsi tərəfindən rədd olunub.
2022-ci ilin dekabr ayından bəri Tehranın Evin həbsxanasında saxlanılan Ocaqlı 2023 ilinin iyul ayında Tehran İnqilab Məhkəməsi 15-ci şöbəsinin hakimi Əbülqasım Salavati tərəfindən 16 il həbsə məhkum olunmuşdu.
Avqust 2023-də siyasi fəalın şikayətinə baxan Tehran vilayətinın Apellyasiya Məhkəməsinin qərarına görə isə, o, “qanunlara qarşı toplaşmaq və əlbir olmaq” ittihamı ilə əlaqədar 5 il, “İslam Respublikası nizamına qarşı təbliğat fəaliyəti” göstərməkdən 1 il və “milli təhlükəsizliyi pozmaq məqsədi ilə əhalini iğtişaş və müharibəyə təşviq etmək” ittihamından 5 il həbsə məhkum edilib.
SEE ALSO: Sina Yusufi: Bu hakim o cəhətdən məşhurdur ki, müttəhimə heç bir haqq tanımırTehranın Apellyasiya Məhkəməsi Ocaqlı haqqında çıxarılan məhrumiyyət cəzalarını da qüvvədə saxlayıb. Onun 2 il müddətinə siyasi partiya, qrup və təşkilatlara üzv olmasına, media və sosial şəbəkələrdə fəallığına və ölkədən çıxışına qadağa qoyulub. Ocaqlı əlavə olaraq türk dili və Azərbaycan tarixi ilə bağlı İranın rəsmi siyasətinə uyğun olaraq yazılmış bəzi kitablar, o cümlədən “Azərbaycan tarixi, mədəniyyəti və dili ilə bağlı suallar və cavablar” adlı kitabı oxuyub və xülasəsini yazmağa məhkum olunub.
Siyasi fəal keçmiş illərdə də göstərdiyi fəaliyyətlər səbəbilə, o cümlədən Dünya Ana Dili Günü tədbirləri ilə əlaqədar həbs və mühakiməyə məruz qalıb.