Hindistanın Baş naziri Narendra Modi bazar ertəsi günü Moskvanın Yeni Dehlinin rəqibi Çinlə əlaqələri gücləndirdiyi bir vaxt münasibətləri möhkəmləndirmək üçün iki günlük səfərlə Rusiyaya gedib.
Yeni Dehli analitikləri deyirlər ki, Rusiya prezidenti Vladimir Putinlə çərşənbə axşamı planlaşdırılan zirvə görüşü Hindistanın Birləşmiş Ştatlarla daha sıx tərəfdaşlıq qurduğu bir vaxt onun uzun müddətli müttəfiqi ilə əlaqələrin soyuması ilə bağlı fikirlərin qarşısını almağa kömək edəcək.
"Hindistanın məqsədi Hindistan-Rusiya əlaqələrinin vacib olduğunu vurğulamaq və Putinin Çinlə artan əlaqələrinin Yeni Dehli ilə əlaqələrə təsir etməyəcəyini təmin etməkdir", Kalinqa Hind Sakit Okean Araşdırmaları İnstitutunun təsisçisi Çintamani Mahapatra Amerikanın Səsinə bildirib.
Sammit Rusiyanın Ukraynaya təcavüzündən sonra ilk sammit olacaq, bu məsələdə Yeni Dehli neytral mövqe tutaraq, nə müharibəni pisləyib, nə də Qərbin Moskvaya tətbiq etdiyi sanksiyalara qoşulub.
Hindistan və Rusiya liderləri 2000-ci ildən bəri illik sammitlər keçirsələr də, Putinin 2021-ci ildə Yeni Dehliyə səfərindən sonra heç bir görüş olmayıb.
Hindistanın xarici işlər naziri Subrahmanyam Jaişankar sammiti iki ölkənin "birlikdə işləməsinin güclü tarixini" vurğuladığını deyib.
Analitiklərin fikrincə, Modinin beş il ərzində Rusiyaya ilk səfərinin diqqət mərkəzində vaxtın sınağından keçmiş əlaqələri gücləndirmək olacaq.
Son illər hərbi texnika alışını diversifikasiya etməsinə baxmayaraq, Hindistan Rusiya silahlarından asılı olaraq qalır. Hindistanın müdafiə idxalının təxminən üçdə biri Moskvadan gəlir, bu, beş il əvvəl üçdə ikiyə nisbətən azalıb.
Ukraynaya müdaxilə başlayandan bəri Rusiyanın ehtiyat hissələri və sursat tədarükü ilə bağlı narahatlıqlar artmaqdadır.
Bu arada, Ukraynaya hərbi müdaxilədən sonra Hindistanın ucuz Rusiya neftinin alışını artırması ilə ikitərəfli enerji ticarəti inkişaf edib. Bununla belə, Moskvanın Hindistana ümumi ixracı 65 milyard dollar olduğu halda, Hindistanın ixracı cəmi 4 milyard dollardır ki, bu da Yeni Dehlidə narahatlıq yaradır.