Ukrayna Hərbi Hava Qüvvələrinin aviasiya rəisi bildirib ki, Qərb müttəfiqləri tərəfindən Kyivə vəd edilən onlarla qabaqcıl F-16 təyyarələrindən bəziləri xaricdə saxlanılacaq. Məqsəd təyyarələri Rusiyanın Ukraynadakı hücumlarından qorumaqdır.
Briqada generalı Serhiy Holubtsov AzadlıqRadiosunun Ukrayna xidmətinin Donbas.Reallıqları layihəsinə verdiyi geniş müsahibəsində bildirib ki, bu addım ölkənin Qərbdə təlim keçmiş pilot korpusuna əməliyyat donanmasını saxlamağa kömək edəcək.
"Müəyyən sayda təyyarələr var ki, onlar Ukraynadan kənarda, təhlükəsiz hava bazalarında saxlanılacaq ki, hədəfə tuş gəlməsinlər", deyə Holubtsov bildirib. O həmçinin əlavə edib ki, "Və bu, müntəzəm texniki xidmət zamanı nasaz təyyarələrin dəyişdirilməsi zərurəti yarandığı halda, bizim ehtiyatımız olacaq."
Prezident Vladimir Putin və digər Rusiya rəsmiləri 2022-ci ilin fevralında genişmiqyaslı işğal başlayandan bəri Ukraynanın xaricdəki müharibə aktivlərini hədəfə ala biləcəkləri barədə xəbərdarlıqlarını artırıb.
Təyyarələrin və ya Ukraynanın digər hərbi aktivlərinin xaricdə saxlanması "NATO-nun münaqişəyə daha da cəlb olunması üçün ciddi təhlükə yarada bilər", deyə hələ Putin keçən il bildirmişdi.
Bununla belə, NATO-ya üzv dövlətlərin liderləri, o cümlədən iyunun 2-də Almaniya kansleri Olaf Şolz dəfələrlə ittifaq ərazisinin “hər kvadrat metrini” müdafiə etməyə hazır olduqlarını bildiriblər.
Rusiya Dumasının Müdafiə Komitəsinin rəhbəri Andrey Kartapolov ötən həftə RİA Novosti-yə istinadən bildirib ki, Ukrayna F-16-larının yerləşdiyi NATO bazaları “qanuni hədəflər” kimi qiymətləndiriləcək.
ABŞ-ın dizayn etdiyi təyyarələrə könülsüz şəkildə razılıq verməsindən sonra Belçika, Danimarka, Hollandiya və Norveç, Ukraynaya 60-dan çox F-16 təyyarəsi vəd etmək üçün səylərini birləşib.
Lakin Holubtsov deyib ki, köhnə F-16-ları tədricən F-35 təyyarələri ilə əvəz edən daha çox ölkə bunu edə bilər.