Ukrayna Müdafiə Nazirliyi təsdiqləyib ki, qüvvələri noyabrın 10-da səhər saatlarında işğal olunmuş Krımda Rusiyaya məxsus iki desant katerinə zərər vurub.
“Bəli, bu məlumat doğrudur,” kəşfiyyat rəsmisi Andrey Yusov Ukraynanın iki media orqanı “Suspilne” və “Hromadske”-də çıxan xəbərlərdən sonra Azadlıq Radiosuna verdiyi məlumatda bildirib. O həmçinin əlavə edib ki, “İki desant gəmisi zədələnib”.
Mediada zərbənin Krımın uzaq qərb hissəsindəki Çornomorskda baş verdiyini və Rusiyanın iki yüksəksürətli desant gəmisinin hədəf alındığı bildirilir.
Rusiya Müdafiə Nazirliyi daha əvvəl bildirmişdi ki, onun hava hücumundan müdafiə qüvvələri işğal olunmuş Krım ərazisi və Moskvanın cənubunda yerləşən Tula bölgəsi üzərində üç Ukrayna pilotsuz təyyarəsinin “qarşısını alıb” və “məhv edib”.
Rusiyanın Belqorod vilayətinin qubernatoru Vyaçeslav Qladkov Ukrayna sərhədindən üç rayonun atəşə tutulduğunu bildirib. Qladkov xəsarət alanlar və dağıntılar barədə məlumat verilmədiyini deyib.
Ukraynanın hava hücumundan müdafiə qüvvələri öz növbəsində bildirib ki, Rusiya pilotsuz təyyarələri noyabrın 10-da səhər tezdən Dnepropetrovsk, Xarkov, Nikolayev, Poltava və Kiyev bölgələrinə hücum edib. O, İran istehsalı olan beş pilotsuz təyyarənin və bir qanadlı raketin vurulduğunu bildirib. Tələfat və dağıntılar barədə dərhal məlumat verilmir.
Noyabrın 10-da vilayət qubernatoru Oleksandr Prokudin bildirib ki, Xersonun cənub bölgəsində son 24 saat ərzində Rusiyanın atəşi nəticəsində 2 nəfər ölüb, 5 nəfər yaralanıb.
Digər tərəfdən isə Ukrayna ordusunun Baş Qərargahı noyabrın 10-da səhər saatlarında bildirib ki, döyüş meydanında Ukrayna qüvvələri bütün cəbhə xətti boyunca 69 yaxın məsafəli döyüş keçirib.
Məlumatda həmçinin deyilir ki, Ukrayna qüvvələri həftələrdir intensiv toqquşmaların yaşandığı Ukraynanın cənub-şərq və cənub bölgələrində onlarla “uğursuz hücumu” dəf edib.
Noyabrın 9-da Ukrayna prezidenti Volodimir Zelenski Rusiyanın Ukraynanın mülki obyektlərinə iki raket zərbəsi endirməsindən sonra hərbi vəziyyət və ümumi səfərbərliyi 90 gün müddətinə uzadacaq qanunları imzalayıb.
Noyabrın 8-də Ali Radada qəbul edilən qanunlar, hərbi vəziyyət və ümumi səfərbərliyin müddətini 2024-cü il fevralın 14-dək uzadıb.
Ukraynada hərbi vəziyyət 2022-ci il fevralın 24-də Rusiyanın genişmiqyaslı işğalının başladığı gün tətbiq edilib. Eyni zamanda ölkədə ümumi səfərbərlik elan edilib. Ukrayna parlamentinin bu müddətin uzadılmasına dair səsverməsi, genişmiqyaslı müharibənin başlamasından bəri doqquzuncu dəfədir həyata keçirilir.