Oktyabrın 27-də İşçi Masası Həmkarlar İttifaqları Konfederasiyasının İdarə Heyəti üzvü Tural Fərzilinin saxlanıldığı deyilir. Bu barədə İşçi Masasından Amerikanın Səsinə bildirilib ki, Fərzili axşam saatlarında onlara mesaj yazaraq iş yerinə polis əməkdaşlarının gəldiyini və onlarla getdiyini deyib.
Məlumata görə, hazırda Tural Fərzili ilə əlaqə saxlamaq mümkün deyil.
Daxili İşlər Nazirliyinin mətbuat xidmətindən İbrahim Əmiraslanlı bildirib ki, Tural Fərzili saxlanılmayıb:
"Yayılan məlumatlar əsassızdır. O, müraciəti ilə əlaqədar polis idarəsinə dəvət edilib, araşdırmanın nəticəsi ilə bağlı tanış olduqdan sonra idarəni tərk edib".
Tural Fərzili saat axşam saat 8 radələrində sərbəst buraxılıb. Onun sözlərinə görə o, idarəyə şikayəti ilə bağlı aparılıb və onunla "profilaktik" söhbətlər aparıblar.
İşçi Masası Konfederasiyasının koordinatoru Afiəddin Məmmədov sentyabrın 20-də həbs olunub. Ona qarşı Cinayət Məcəlləsinin (CM) 126.1-ci (qəsdən sağlamlığa ağır zərər vurma) və 221.3-cü (xuliqanlıq-silah qismində istifadə olunan əşyalardan istifadə etməklə törədildikdə) maddələri ilə ittiham irəli sürülüb. Onun barəsində 2 aylıq həbs qətimkan tədbiri seçilib.
Təşkilatın digər üzvləri Elvin Mustafayev və Ayxan İsrafilov narkotik ittihamı ilə həbs olunublar və hər ikisi barəsində 4 aylıq həbs qətimkan tədbiri seçilib.
Fəalların üçü də özlərini təqsirli bilmir və həbsini siyasi fəaliyyətləri ilə əlaqələndirirlər.
Hüquq müdafiəçilər fəalların həbsini siyasi motivli hesab edir.
Hökümət nümayəndələri isə Azərbaycanda siyasi motivli həbslərin olmadığını bildirir.