Siyasi fəal Əmir Mərdani Amerikanın Səsinə söhbətində İran Azərbaycanında tutulan fəalların uzun müddət ailələrinə məlumat verilmədən nəzarətdə saxlanmalarının səbəbləri və təsirləri haqqında danışıb.
Your browser doesn’t support HTML5
Əmir Mərdani: İran hakimiyyəti həbs etdiyi fəallardan əlavə onların yaxınlarına da təzyiq edir
Mərdani deyib ki, hakimiyyət fəalları dünyadan təcrid edilmiş bir şəkildə nəzarətdə saxlayaraq sadəcə onlara qarşı deyil, onların ailə üzvləri, digər yaxınları və dostlarına da basqı tətbiq edir.
"Bu hakimiyyət istəyir göstərsin ki, siz haqqınızı istəsəniz, sadə deyək, itib batacaqsınız və heç kəsin xəbəri olmayacaq. Zorakılıq, repressiya və basqı ilə bir qorxu atmosferi yaradaraq hakimiyyətini ayaqda tutur. Hakimiyyət bununla istəyir insanlar düşünsün ki, siyasi fəaliyyətə girsələr onlara çoxa başa gələr. Onların da ailəsi basqılara məruz qalar, talelərindən xəbərsizlik olar və gələcəklərini itirərlər," sabiq siyasi məhbus bildirib.
O, fəalların saxlanılmasından bəri ailələri ilə birlikdə məruz qaldığı basqılara diqqət çəkərək deyib: "Fəalları həbs etdikləri zaman döyürlər. Ağır şərtlərdə saxlayırlar. Ailələr aylarca onlardan xəbərsiz qalır. Qanunda yazılan haqları da onlara verilmir. Vəkilsiz qalırlar. Qanunən onların icazəsi var ki, evlərinə zəng açıb və özləri ilə bağlı, sağlıq durumları ilə bağlı məlumat versinlər. Amma bu icazə verilmir. Ailələrə gəlincə, bir çox basqıya məruz qalırlar, təhdid olurlar."
Sabiq siyasi məhbus hesab edir ki, ailələri övladlarından xəbərsiz saxlayaraq "onların tələblərinin səviyyəsini aşağı çəkmək" istəyirlər.
SEE ALSO: İran Azərbaycanında siyasi məhbuslara dəstək kampaniyaları davam edir"Gedib mənim övladım haradadır deyən ailələr cavab yerinə bir də təhdidlərlə üzləşir. Nə üçün? Çünkü İran hakimiyyəti istəyir ki, artıq onların belə tələbi olmasın ki, mənim günahsız övladımı niyə sadəcə haqqını tələb etdiyi üçün tutubsunuz? Hakimiyyət istəyir onların tələbini endirsin buna ki, siz Allah, icazə verin biz bir dəfə onunla danışaq!"
Əmir Mərdani İran hakimiyyətinin bu siyasətinə qarşı ailələrin övladlarının şəraiti ilə bağlı məlumat yaymalarının vacib olduğunu vurğulayır.
"Əslində elə ailələrin saxlanılan övladları haqqında bilgi paylaşmasıdır ki, bəlkə hakimiyyəti geri oturtmağa məcbur edə bilər," o bildirib.
SEE ALSO: Mahmud Bilgin: Təbrizdə saxlanılan fəalların nəzarət müddəti saxta etiraf almaq üçün uzadılır"İran hakimiyyəti bir fəalı saxladığı zaman bir onun özünə basqı edir, bir də eşikdə onun yaxınlarına. Onun özünü içəridə tamamən həbsxana xaricindəki dünyadan təcrid edir və xəbərsiz saxlayır. Həbsxana xaricində də ona yaxın olanlara basqı gətirir ki, amandır bu məhbusla bağlı heç bir bilgi verməyin. Çünki, bu xəbərsizliklə bir qorxu fəzası yaradır... bu qorxu atmosferini sındırmaq üçün ailələrə bunu çardırmalıyıq ki, əgər istəyirsiniz həbsdəki övladınızdan xəbərdar olasınız, İran hökümətinə ən başda basqı bu ola bilər ki, biz o məhbus haqqında danışaq və onların məsələsini dünyaya çatdıraq", siyasi fəal əlavə edib.