Çinin Müdafiə Nazirliyinin verdiyi məlumata əsasən, Çin dəniz donanması “strateji su yollarının təhlükəsizliyini təmin etmək” məqsədi daşıyan təlimdə Rusiya donanması və hava qüvvələrinə qoşulmaq üçün bazar günü Yapon dənizinə yola düşüb.
“Şimal. Qarşılıqlı təsir-2023” kod adını alan təlimlər Çin və Rusiya arasında hərbi əməkdaşlığın genişlənməsini qeyd edir və Pekinin ABŞ-ın iki ölkə arasında hərbi təmasların bərpası çağırışlarını rədd etməyə davam etdiyi bir vaxtda keçirilir.
Çinin Global Times qəzeti hərbi müşahidəçilərə istinadən xəbər verir ki, bu, ilk dəfədir ki, Rusiya Federasiyasının həm dəniz, həm də hərbi hava qüvvələri təlimlərdə iştirak edəcək.
Yapon dənizində manevrlərdə iştirak edən Rusiyanın iki hərbi gəmisi bu ayın əvvəlində Şanxayda Çin donanması ilə birgə təlim, rabitə və dəniz xilasetmə işlərini həyata keçirmək üçün ayrı-ayrılıqda təlimlər keçirib.
2022-ci ilin fevralında Rusiyanın Ukraynaya genişmiqyaslı müdaxiləsi başlamazdan bir neçə gün əvvəl Rusiya prezidenti Vladimir Putin və Çin lideri Şi Tsinpin hərbi əməkdaşlığın mühüm istiqamətlərdən biri olduğu “sonsuz” tərəfdaşlıq əlaqələrini elan etmişdilər.
Bu yaxınlarda Pekinə səfər edən ABŞ-ın maliyyə naziri Janet Yellen Çin rəsmiləri ilə danışıqlarda Çinin Rusiyaya hərbi yardım göstərəcəyi təqdirdə üzləşə biləcəyi mümkün nəticələri vurğulayıb.