Bəzi respublikaçı qanunvericilər yaxınlaşan tənəzzülü, daha çox nəzarətə ehtiyac olduğunu və Çinin rəqabət aparan təhlükəsizlik narahatlıqlarını əsas gətirərək, ABŞ-ın Ukraynaya yardımının həcmini şübhə altına alır. Sorğular Respublikaçıların ara seçkilərdə Nümayəndələr Palatasının nəzarətini qazanmayacağını proqnozlaşdırır. Bunun gələcəkdə ABŞ-ın Ukraynaya dəstəyinə necə təsir edə biləcəyi sual doğurur.
Ukraynalılar hələ də paytaxt Kyivə, mülki binaları və infrastrukturu dağıdılan digər şəhərlərə pilotsuz təyyarələr və raket hücumlarından əziyyət çəkir.
"İnsanlarımız hər gün ölür. Biz hər gün bütün dünyada demokratiyanın müdafiəsinə qalxırıq. Evlərimizin atəşə tutulması, dağıdılması, insanlarımızın öldürülməsi ilə bağlı hər gün nə baş verdiyini görə bilərsiniz. Dəstəyi azalda bilməzsiniz, yalnız artırmaq lazımdır" - deyə, Ukrayna Xalq Partiyasının sədri Olena Şuliak bildirib.
Olena Şuliak Amerikanın Səsinə bildirib ki, ukraynalılar noyabrda keçiriləcək və Demokratların Konqresdə əksəriyyətini cüzi itirə biləcəyi ara seçkiləri ərəfəsində ABŞ siyasətini yaxından izləyir. Respublikaçılar qalib gəlsə, Nümayəndələr Palatası Kyivə daha çox yardım göstərilməsinə qarşı çıxa bilər.
Nümayəndələr Palatasında Azlıqların lideri Kevin Makkarti Punchbowl News-a bildirib ki, tənəzzül yaxınlaşdıqca amerikalılar "Ukraynaya kart-blank" yazmayacaq.
Digər Respublikaçı qanunvericilər də ABŞ-ın Çin ordusunun güclənməsi təhlükəsinə daha çox diqqət yetirməli olduğunu deyir.
"Biz Konqreslə işləməyə davam edəcəyik və bu səylərlə bağlı danışıqları izləməyə davam edəcəyik və lazım olan müddətdə Ukraynanı dəstəkləyəcəyik. Biz öz azadlıqları və demokratiyaları uğrunda hər gün mübarizə aparan cəsur ukraynalılara verdiyimiz sözə əməl edəcəyik" - deyə, Ağ Evin mətbuat katibi Karin Jan-Pyer bildirib.
Müşahidəçilər deyir ki, Respublikaçılar Partiyasında təcridçilik meyllərinin artması ilə bəziləri Ukraynaya xüsusilə humanitar və iqtisadi ehtiyaclar üçün yardımın azalacağından narahatdır.
Bununla belə, ABŞ-ın təhlükəsizlik yardımı ilə bağlı narahatlıq daha azdır.
"ABŞ-da hərbi sənaye kompleksi və sənayeni dəstəkləmək üçün ümumiyyətlə sağ tərəfin maraqları haqqında düşünsəniz, indi Ukraynada və bütün [NATO] şərq cinahında avropalıların ən çox ehtiyacı nədir? Bu, silah sistemlərinə, sursatdan tutmuş HIMARS, pilotsuz təyyarələr kimi çox mürəkkəb silah sistemlərinə qədər hər şeyə ehtiyacdır. Avropada müdafiə büdcələri o qədər artıb ki, müdafiə xərclərinin artımı rəfdə mövcud olanı üstələyir" - deyə, Amerika Birləşmiş Ştatlarının Alman Marşal Fondundan Kristin Berzina bildirib.
Birləşmiş Ştatlar Ukraynaya 60 milyard dollardan çox yardıma icazə verib və fevral ayında müharibə başlayandan bəri 17 milyard dollardan çox təhlükəsizlik yardımı ayırıb. May ayında Senat 40 milyard dollardan çox yeni hərbi və humanitar yardıma səs verib, bəzi respublikaçılar isə bunun əleyhinə çıxıb.