Rusiya, Ukrayna və Türkiyənin hərbi nümayəndə heyətləri Rusiyanın Ukraynaya müdaxiləsi səbəbindən Ukraynadan taxılın dayandırılan təhlükəsiz ixracı məsələsini müzakirə etmək üçün BMT nümayəndələri ilə görüşərəklər.
Türkiyənin müdafiə naziri Hulusi Akar iyulun 12-də bildirib ki, görüş iyulun 13-də İstanbulda baş tutacaq.
Türkiyə prezidenti Rəcəp Tayyib Ərdoğan iyulun 11-də Rusiya prezidenti Vladimir Putin və Ukrayna prezidenti Volodimir Zelenski ilə ayrı-ayrılıqda keçirdiyi telefon danışığında Ukraynadan taxıl ixracını müzakirə edib.
Ukrayna və onun müttəfiqləri Ukraynanın Qara dəniz limanlarının yenidən açılmasına çalışır. Kyiv bu limanların Rusiyanın blokadasına görə bağlandığını bildirir.
Qərb ölkələri taxılın, xüsusən də əhalisini təmin etmək üçün Ukrayna taxılından asılı olan Yaxın Şərq və Afrika ölkələrinə daşınmasına imkan vermək üçün limanların yenidən açılması ilə bağlı tələblərini gücləndirib.
Ərdoğan Putinə BMT-nin Qara dənizdə taxıl ixracı üçün təhlükəsiz dəhlizlər yaratmaq planı ilə bağlı hərəkətə keçməyin vaxtının çatdığını deyib.
Anadolu dövlət xəbər agentliyinin hökumətin ictimai əlaqələr ofisindən verilən açıqlamasına istinadən bildirdiyinə görə, Ərdoğan müharibənin dayandırılması üçün davamlı və ədalətli sülhə ehtiyac olduğunu bir daha təkrarlayıb.
Zelenski Twitter səhifəsində Ərdoğanın taxıl ixracının bərpasında göstərdiyi yardımı yüksək qiymətləndirdiyini bildirib və əlavə edib ki, Rusiyanın işğal olunmuş bölgələrdən Ukrayna taxılını çıxarmasına son qoyulmalıdır.
