Təhlükəsizlik qüvvələrinin Homs şəhərində etirazçılara qarşı ölümlə nəticələnən əməliyyatlarından sonra Suriyanın müxalifət qrupları beynəlxalq ictimaiyyəti mülki vətəndaşların müdafiəsinə çağırıb. Suriya Milli Şurasının bugünkü məlumatında Homsda fəlakətin baş verdiyi, beynəlxalq ictimaiyyətin və ərəb müşahidəçilərinin bölgəyə diqqəti artırmalı olduğu deyilir. Fəallar təhlükəsizlik qüvvələrinin gecə saatlarında şəhərin yaşayış bölgəsinə hücum etdiyini və nəticədə bir nəfərin öldüyünü bildirmişlər.
Dünən isə çoxu Homsda olmaqla, təhlükəsizlik qüvvələri tərəfindən azı 13 nəfərin qətlə yetirilidyi bildirilmişdi.
