Cənubi Koreya xristianlardan ibarət qrupa Şimali Koreya ilə sərhəddə yolka ağacı şəklində poladdan hazırlanmış buruğun işıqlarla bəzədilməsinə icazə verib.
"Yolka ağacı"nın işıqlandırılması Şimali Koreyanın bu yaxınlarda uzun mənzilli raket sınağı keçirməsinə cavab kimi qiymətləndirilir. Həm Cənubi Koreya, həm ABŞ Şimali Koreyanın qadağan edilmiş raket texnologiyalarını sınaqdan keçirdiyini bildirir.
Kilsə üzvləri tərəfindən bəzədilən "yolka ağacı"nın üzərindəki işıqlar yanvar ayına qədər yandırılacaq.
Pxenyan bunu təbliğat kampaniyası kimi qəbul etsə də, hələlik rəsmən cavabını bildirməyib.
"Yolka ağacı" keçən il Şimali Koreya lideri Kin Yonq İlin vəfatından sonra gərginliklərin yaranmasına yol verməmək üçün yerləşdirilməmişdi.
