Prezident İlham Əliyevin oktyabrın 17-də Eldar Mahmudovu milli təhlükəsizlik naziri vəzifəsindən azad etməsindən sonra Azərbaycanın yerli mediasında onun saxlanılması barədə xəbərlər yayılıb.
Bu barədə ilk xəbəri haqqin.az saytı yayıb.
Xəbərdə deyilir ki, keçmiş milli təhlükəsizlik naziri vəzifə səlahiyyətlərini aşaraq ali rəhbərliyə daxil olan şəxslərin telefon danışıqlarının dinlənilməsini həyata keçirib.
Məlumatda Eldar Mahmudovla bərabər MTN-nin digər bir qrup yüksək vəzifəli şəxslərinin saxlnadığı da bildirilir.
Amerikanın Səsinin keçmiş milli təhlükəsizlik nazirinin saxlanması barədə xəbərlərin doğru olub-olmaması barədə sorğusuna Azərbaycan Baş Prokurorluğunun mətbuat xidmətindən, “bu barədə mətbuat xidmətində hər hansı məlumat yoxdur”, deyə cavab veriblər.
