Sentyabrın 9-da Beynəlxalq Diaspor Mərkəzinin (BDM) təşkilatçılığı ilə Türkiyənin Azərbaycandakı səfirliyi qarşısında Türkiyəyə dəstək aksiyası keçirilib.
Aksiya iştirakçılarının AzadlıqRadiosuna dediklərinə görə, məqsəd son zamanlar Türkiyədə PKK-nın həyata keçirdiyi terror aktlarını qınamaqdır.
Aksiyaçılar əvvəlcə Mustafa Kamal Atatürkün abidəsi önünə əklil qoyublar, daha sonra səfirliyin önünə doğru yürüş keçirilib.
Etirazçılar «Türkiyə-Azərbaycan!», «Terrora son!» kimi şüarlar səsləndiriblər.
Aksiyanın qətnaməsi oxunaraq səfirliyin əməkdaşlarına təqdim olunub.
Aksiya polis müdaxiləsi olmadan baş tutub.
