İyunun 14-nə keçən gecə Rusiya ordusu Odessaya raket zərbələri endirib. İlkin məlumatlara görə, 3 nəfər ölüb, 7 nəfər yaralanıb. Bu barədə "Cənub" əməliyyat komandanlığından məlumat verilib. Rusiya Federasiyasının Müdafiə Nazirliyi bu məlumatla bağlı şərh verməyib.
Ukrayna ordusunun məlumatına görə, Qara dənizdə olan gəmidən Odessaya dörd Kalibr raketi atılıb.
Partlayış nəticəsində şəhərin mərkəzindəki biznes mərkəzi, təhsil müəssisəsi, yaşayış kompleksi, ərzaq obyektləri və mağazalara ziyan dəyib. Bundan əlavə, pərakəndə satış şəbəkələrindən birinin anbarına düşən raket 1000 kv.metr ərazinin dağılmasına səbəb olub və 400 kv.metr sahədə yanğın baş verib.
Hazırda dağıntılar təmizlənir. Dağıntılar altında insanlar ola bilər.
Dövlət Fövqəladə Hallar Xidmətinin Odessa vilayəti üzrə Baş İdarəsinin mətbuat xidmətinin məlumatına görə, dağılmış biznes mərkəzinin yanındakı dayanacaqda avtomobil yanıb.
Odessa Vilayəti Hərbi Administrasiyasının verdiyi ilkin məlumata görə, iki raket hava hücumundan müdafiə qüvvələri tərəfindən vurulub. " İstintaq qruplarının işi ilə əlaqədar Odessaya nəqliyyatın girişinə müvəqqəti məhduduyyətlər tətbiq edilib" - deyə, bildirilib.
UNİAN və Zerkalo Nedeli xəbər verir ki, hücumdan əvvəl Odessada hava xəbərdarlığı elan edilib və sonra şəhərdə güclü partlayışlar baş verib. Odessa Vilayət Administrasiyasının spikeri Serhiy Bratçuk şəhər sakinlərini sığınacaqlarda qalmağa çağırıb.
Dnepropetrovsk Vilayət Administrasiyasının rəhbəri Serhiy Lısak bildirdiyinə görə, iyunun 14-nə keçən gecə Rusiya hərbçiləri, həmçinin Dnepropetrovsk vilayətinə "Şahed" pilotsuz uçuş aparatları ilə hücum edib. Onun sözlərinə görə, hər üç kamikadze pilotsuz təyyarəsi Hava Hücumundan Müdafiə Qüvvələri tərəfindən vurulub.
Ukrayna Hərbi Hava Qüvvələrinin komandanlığı bəyan edib ki, iyunun 14-nə keçən gecə Rusiya qoşunları Ukraynanın hərbi və infrastruktur obyektlərinə havadan və dənizdən qanadlı raketlərlə zərbələr endirib.
Öz növbəsində Donetsk Vilayət Administrasiyasının rəhbəri Pavel Kirilenko Kramatorsk və Konstantinovka şəhərlərinin də raket atəşinə tutulduğunu bildirib. "Kramatorskda iki nəfər ölüb, iki nəfər yaralanıb, Konstantinovkada bir nəfər ölüb və bir nəfər yaralanıb" - deyə, Pavel Kirilenko bildirib.
