Ukrayna rəsmiləri çərşənbə günü Rusiyanın ölkənin qərbindəki Lviv şəhərinə hava hücumu nəticəsində azı 7 nəfərin öldüyünü, 30-dan çox insanın yaralandığını bildirib.
Lviv meri Andriy Sadovıy Telegram kanalında yayımladığı videoda hücum nəticəsində bir binanın dağıldığını, məktəblər və evlər də daxil olmaqla, 50-dən çox tikilinin zədələndiyini bildirib.
Rusiya qoşunlarının Dnipropetrovsk vilayətindəki Kriviy Rih şəhərinə hücumu nəticəsində 5 nəfər yaralanıb, evlərə ziyan dəyib.
Ukrayna prezidenti Volodimir Zelenski Ukraynanın Qərb tərəfdaşlarına hava hücumundan müdafiə yardımı göstərməyə və Ukraynanı təmin etdikləri silahlarla Rusiya daxilindəki mövqeləri hədəf ala biləcəkləri ilə bağlı məhdudiyyətləri yüngülləşdirməyə çağırışlarını davam etdirib.
"Tərəfdaşlarımızı Ukraynanı daha çox uzaqməsafəli silahlarla təmin etməsinə inandıran və bununla terrora ədalətli cavab verməyə bizə imkan yaradan hər kəs Rusiya terrorçularının Ukrayna şəhərlərinə bu cür zərbələrinə yol verməməyə çalışır. Terror dayandırılmalıdır", - Zelenski deyib.
Ukrayna ordusunun bildirdiyinə görə, Rusiya hava hücumlarının son raundunda 13 raket və 29 pilotsuz uçuş aparatdan istifadə edib. Ukrayna Hava Hücumundan Müdafiə Qüvvələri raketlərdən 7-sini, pilotsuz təyyarələrdən 22-sini vurub.
Hücumların hədəfində olan bölgələr arasında Çernihiv, İvano-Frankivsk, Volın, Ternopil, Kyiv, Jitomir, Poltava və Sumı də var.
Çərşənbə günü hücumları Rusiyanın Poltava şəhərində azı 51 nəfərin ölümü, 300-ə yaxın insanın yaralanması ilə nəticələnən raket zərbəsindən bir gün sonra həyata keçirilib.
ABŞ prezidenti Co Bayden çərşənbə axşamı hücumun "təəssüf doğurduğunu" deyib.
"Bu hücum Putinin azad xalqın iradəsini qırmaq üçün vicdansız cəhdlərini davam etdiyini bir daha xatırladır" - deyə, Bayden bildirib.
ABŞ lideri həmçinin ABŞ-ın Ukraynanı özünü qorumaq üçün lazım olan hava hücumundan müdafiə vasitələri ilə təmin edəcəyinə dair vədlərini bir daha təkrarlayıb.
Rusiya Müdafiə Nazirliyi çərşənbə günü Belqorod vilayətində Ukraynanın 2, Kursk üzərində 1 pilotsuz təyyarəsini, Qara dəniz üzərində isə digərini vurduğunu bildirib. Nazirlik Rusiya qüvvələrinin Qara dənizdə 4 pilotsuz qayığı da məhv etdiyini bəyan edib.
Forum