Rusiyanın Sputnik peyvəndinin effektivliyi ilə bağlı şübhələr artmaqdadır. Belə ki, Çex Respublikası və Braziliyadakı dərman tənzimləyiciləri peyvəndin təsdiqini ləğv edib, Slovakiyadakı həmkarları isə peyvəndlə bağlı şübhələrini ifadə edib.
Avropa İttifaqı tənzimləyiciləri Sputnik-in effektivliyi və təhlükəsizliyi hələ də qiymətləndirir. Avropa Dərman Agentliyinin (EMA) keçmiş icraçı direktoru Politico.eu xəbər saytına Braziliyanın tənzimləyici orqanı Anvisa-nın Sputnik haqqında qaldırdığı etirazların ciddi qəbul ediləcəyini deyib.
"Bu, çox ciddi bir münasibətdir" - deyə, Rasi keyfiyyət və təhlükəsizlik məsələləri ilə bağlı narahatlığını ifadə edib.
Anvisa aprelin 28-də Ümumdünya Səhiyyə Təşkilatı (ÜST) tərəfindən tövsiyə olunan peyvənd standartlarına uyğun olmayan “məhsul inkişafındakı qüsurlar” səbəbindən təsdiqindən imtina etdiyini açıqlayıb.
Təşkilat, həmçinin keyfiyyətə nəzarət, təhlükəsizlik və effektivlik məlumatlarının kifayət qədər olmadığını və ya çatışmadığını, "immun sistemi problemləri ilə yanaşı tənəffüs sistemində problemlər olan" insanlar üçün effektivliyi ilə bağlı narahatlıqların artdığını bildirib.
Slovakiyanın Dərman Agentliyi (SÚKL) də keyfiyyətə nəzarət və yetərli məlumatın olmamasından narahat olduğunu dilə gətirib. SÚKL-un rəhbəri İrena Storova Slovakiyanın Radiožurnal-a verdiyi açıqlamasında dərman tənzimləyicinin “peyvəndin qeydiyyatı və ya qiymətləndirilməsi ilə bağlı sənədlərin yalnız bir hissəsini” aldığını deyib.
Sputnik nüfuzlu beynəlxalq tənzimləyici tərəfindən deyil, yalnız Rusiya tərəfindən qeydiyyatdan keçən ilk koronavirus peyvəndidir. Yarım əsr əvvəl fəzaya uçan Sputnik peykinin adı verilən peyvənd dövlət tərəfindən maliyyələşdirilərək, Moskvadakı Gamaleya Tədqiqat İnstitutunda hazırlanıb. Peyvəndin tez bir zamanda, keçən ilin avqust ayında Rusiya tərəfindən təsdiqlənməsi beynəlxalq elmi təşkilatlar tərəfindən şübhə ilə qarşılanıb.
