Həbsdə olan hüquq müdafiəçisi Leyla Yunusun səhhəti ağır olaraq qalır və pisləşir. Bu barədə vəkil Elçin Qəmbərov bildirib.
“Onu tibb məntəqəsinə köçürmürlər, üstəlik oktyabrın 30-da alman həkim Vittin yazdığı dərmanları da vermirlər. L.Yunusun tibb məntəqəsinə köçürülməsi barədə çoxsaylı müraciətlər cavabsız qalıb”, vəkil qeyd edib.
“Ağır fiziki durum Leyla Yunusun psixoloji vəziyyətinə də təsir göstərib. Doktor Vitt müayinədən sonra deyib ki, onu tibb məntəqəsinə yerlədirməkdən imtina edən həkimlərin hərəkəti xəstəyə siyasi təzyiqdən başqa bir şey deyil”, E.Qəmbərov bildirib və bu cür davranışı “açıq işgəncə” adlandırıb.
Xatırladaq ki, 60 yaşlı Leyla Yunus hepatit C və diabetin ağır formasından əziyyət çəkir. Leyla Yunus 2014-cü il iyulun 30-da, həyat yoldaşı Arif Yunus isı avqustun 5-də həbs edilib. Onlara qarşı dövlətə xəyanət və bir sıra iqtisadi cinayətkarlıqla bağlı ittihamlar irəli sürülüb.Yunuslar ittihamları siyasi sifariş hesab edir, özlərini günühkar saymır.
Amnesty İnternational Leyla və Arif Yunusları “vicdan məhbusu” elan edib.
Ötən həftə Arif Yunus ölkədən çıxmamaq barədə iltizamla həbsdən azad edilib.
