LSM.lv portalının məlumatına görə, Riqa Abidələr Agentliyi şair Aleksandr Puşkinin paytaxtın Kronvalda parkında ucaldılan abidəsini sökərək, Rəssamlar İttifaqının Muzeyinə köçürmək üçün anbara yerləşdirib.
Nəşrin bildirdiyinə görə, heykəlin köçürülməsi qərarı 2009-cu ildə Riqanın Tarixin Qorunması və İnkişafı Mərkəzinin şurası və Mədəniyyət Abidələrinin Mühafizəsi üzrə Dövlət Müfəttişliyi tərəfindən verilib. Adı çəkilən idarələr heykəlin Kronvalda parkından çıxarılaraq, başqa bir yerə köçürülməsini tövsiyə edib.
Riqa Şəhər Şurasının Abidələr Şurası Rusiya şairinin abidəsinin köçürülməsinə 2023-cü il martın əvvəlində qərar verib. Bu qərar Riqa Şəhər Şurasının koalisiyasında da dəstəklənib.
Bundan əvvəl də Riqa Şəhər Şurasının Abidələr Şurası şəhərin daxilində yerləşən Sovet dövründən qalma altı abidənin "Sovet rejimini tərənnüm etdiyinə görə" sökülməsini və ya başqa yerə köçürülməsini dəstəkləyib.
2022-ci ilin yayında Latviya Seymi "Latviya Respublikası ərazisində Sovet və nasist rejimlərini tərənnüm edən obyektlərin nümayişini qadağan edən və onların sökülməsinin həyata keçirilməsi ilə bağlı" qanun qəbul edib. Sənədə əsasən belə abidələr noyabrın 15-dək sökülməlidir. Söküləcək siyahıya 69 abidə daxildir.
Avqustun sonunda Latviya hökuməti Sovet Latviyasını və Riqanı nasist işğalçılarından azad edən Sovet Ordusunun əsgərlərinə həsr olunmuş abidəni söküb. Oktyabr ayında isə Dauqavpilsdə Sovet əsgərlərinin iki abidəsi - Şöhrət Meydanındakı abidə və 18 Noyabr küçəsindəki Qardaşlar Qəbiristanlığı ilə üzbəüz xatirə abidəsi sökülüb.
Öz növbəsində Rusiya Müdafiə Nazirliyi bəyan edib ki, başqa ölkələrdə sökülən Sovet İttifaqına aid hərbi abidələri Rusiya öz ərazisində bərpa edəcək.
