Avropanın dərman tənzimləyicisi Avropa Dərman Agentliyi (EMA) çərşənbə axşamı Johnson&Johnson COVID-19 peyvəndi ilə nadir qan laxtalanma formaları arasında mümkün əlaqə aşkar etdiyini, lakin peyvəndin faydalarının risklərindən daha çox olduğunu bildirib.
Agentlik çərşənbə axşamı verdiyi açıqlamada bildirib ki, dərman təhlükəsizliyi ilə məşğul olan Pharmacovigilance Risk Qiymətləndirmə Komitəsi (PRAC) bütün mövcud dəlilləri nəzərdən keçirdikdən sonra Johnson&Johnson peyvəndi barədə məlumata qan trombositləri olan qeyri-adi qan laxtalanması ilə bağlı xəbərdarlığın da daxil edilməli olduğu haqda nəticə çıxarıb.
Komitə bunun peyvəndin çox nadir hallarda baş verən yan təsirləri kimi qeyd olunmalı olduğuna qərar verib.
EMA həmçinin nadir qan laxtalanma formaları arasında mümkün əlaqənin aşkar edildiyi AstraZeneca peyvəndi haqda da oxşar qiymətləndirmə verib.
EMA Johnson & Johnson peyvəndini ABŞ-da peyvənd vurulmuş insanlar arasında aşağı səviyyədə qan trombositləri ilə əlaqəli qeyri-adi qan laxtalanması ilə bağlı bir ölümlə nəticələnən ciddi hallar haqda az sayda məlumatlardan sonra nəzərdən keçirib. Aprel ayının 13-nə qədər ABŞ-da 7 milyondan çox insana Johnson&Johnson peyvəndi vurulub.
Qanda laxtalanma halları peyvənd vurulduqdan sonra üç həftə ərzində əksəriyyəti qadınlarda olmaqla, 60 yaşadək insanlarda əmələ gəlib.
Bu məlumatlar ABŞ-ın Xəstəliklərə Nəzarət və Profilaktika Mərkəzləri (CDC) və Ərzaq və Dərman İdarəsini daha çox araşdırma aparılması üçün keçən həftə Johnson&Johnson peyvəndinin tətbiqinə fasilə verilməsinə çağırmasına səbəb olub.
Bazar ertəsi ABŞ-ın Milli Allergiya və Yoluxucu Xəstəliklər İnstitutunun rəhbəri, prezidentin tibb üzrə məsləhətçisi Entoni Fauçi jurnalistlərə peyvəndin istifadəsindəki fasilənin bu həftə qaldırıla biləcəyini deyib.
