İsrail oktyabrın 21-də HƏMAS-İsrail müharibəsi nəticəsində didərgin düşmüş fələstinlilərə yardımın çatdırılmasına icazə verməyə başlamasından bəri yardım karvanları hər gün Qəzzaya doğru irəliləyir. Lakin yük maşınları uzun yol qət etməlidir, çünki İsrail yüklər mühasirəyə alınmış anklava çatmazdan əvvəl onları yoxlamaqda israrlıdır.
HƏMAS-la İsrail arasında döyüşlər başlayandan bəri Qəzzaya su, ərzaq, tibbi ləvazimatlar və sığınacaqlar üçün humanitar ləvazimatlarla dolu 700 yük maşını daxil olub. Onlardan 100-ə yaxını İsrailin Nitsana məntəqəsindəki bu keçid məntəqəsindən keçir.
Burada onlar Qəzza zolağına qaçaqmalçılıq yolu ilə gətirilə biləcək hər şeyi yoxlayır.
Misir nömrə nişanlı yük maşınları Nitzanaya səhər saat 8-də gəlməyə başlayır. Hər bir yük maşını ayrı-ayrılıqda yoxlanılır, itlər partlayıcıları axtarır.
İki-üç saatdan sonra 20-30 yük maşınından ibarət karvan İsrail Müdafiə Qüvvələrinin nəzarəti altında sərhədin Misir tərəfindən Qəzzaya gedən Rəfah keçidinə doğru irəliləyir.
İsrail Müdafiə Ordusunun Qəzza üzrə Koordinasiya və Əlaqələndirmə İdarəsinin rəhbəri, polkovnik Moşe Tetro Qəzzada məcburi köçkün olan fələstinlilərin vəziyyətini "böhran" deyil, "humanitar çətinlik" adlandırır. "Biz bilirik ki, Qəzza zolağında mülki əhalinin vəziyyəti yüngül deyil. Biz bilirik ki, çoxlu problemlər var. Biz bilirik ki, çoxlu çətinliklər var. Onu deyə bilərəm ki, Qəzza zolağında humanitar böhran yoxdur. Biz müharibə şəraitindəyik. Bu müharibəni biz başlamadıq. Bu müharibəni HƏMAS seçdi.”
Tetro deyir ki, yük maşınlarının sayını artırmaq üçün İsrail Nitzana keçidində "təhlükəsizlik yoxlama imkanlarını iki dəfədən çox artırmalı olub". "Biz xəstəxanalara tibbi ləvazimatların çatdırılmasını Beynəlxalq Qırmızı Xaç Komitəsi və digər beynəlxalq təşkilatlarla birlikdə koordinasiya edirik. Biz yaralıların Misirə təxliyəsini koordinasiya edirik. Demək olar ki, hər gün. Koordinasiyanın olmadığı yeganə günlər HƏMAS-ın bunu dayandırdığı günlərdir və bu, İsrailin günahı deyil".
Tetro deyir ki, humanitar yardım hərbi məqsədlər üçün yönəldilməyənə qədər davam edəcək. O, həmçinin İsrailə Qəzzaya hər hansı yanacağın keçməsinə icazə verməməsi ilə bağlı yönəldilən tənqidləri rədd edib və deyib ki, əgər Həmas onun döyüşçülərinə deyil, xalqa kömək etmək üçün istifadə edilməsinə icazə versə, orada kifayət qədər yanacaq var. "Biz müharibədən əvvəl Qəzzaya nə qədər yanacaq daxil olduğunu bilirik. Və yanacağın kifayət qədər olmadığını deyənlərə sualımız budur: 'Bəs niyə bu yanacağı Qəzza şəhərinin altındakı terror tunellərinə aparırsan, terrorçuların işığı olsun deyə".
Rəfahda fələstinlilərə xidmət edən BMT-nin Qaçqınlar Agentliyi yükləri müxtəlif nəqliyyat vasitələrinə daşımaqla, humanitar yardımın paylanmasını öz üzərinə götürüb. Müharibədən əvvəl bir çox yük maşını İsraildən birbaşa Qəzzaya Kerem Şalom məntəqəsi vasitəsilə keçirdi.
Bu günlərdə həm Kerem Şalom, həm də Erez piyada keçidi bağlanıb.
Tetro deyir ki, o, HƏMAS-ın Erezə hücumu zamanı üç əsgərini itirib və İsrailin etdiyi kimi, müharibə zamanı düşmənin mülki əhalisinə humanitar yardım üçün təhlükəsiz keçidi təmin edən çox ölkə tanımır.
Forum