Prezidentliyə namizəd İranda milli azlıqların problemlərini həll edəcəyinə söz verib

İran prezidentliyinə namizəd Məhəmməd Rza Arif ölkədə milli azlıqların problemlərinin həll olunması məqsədilə xüsusi təşkilat yaratmağı planlaşdırır. Trend agentliyinin məlumatına görə, o bu barədə Kürdüstan vilayətinə səfəri zamanı bildirib.

Arif İran Konstitusiyasının 15-ci maddəsinə müvafiq olaraq, azlıqların həyat şəraitinin yaxşılaşdırılması üçün əlindən gələni edəcəyinə söz verib.

İran Konstitusiyasının 15-ci maddəsində bildirilir: "Rəsmi dil (İranın) ... fars dilidir ... lakin ... regional və azlıqların dillərinin mətbuat və KİV-də, o cümlədən məktəblərdə öyrədilməsinə fars dilinə əlavə olaraq icazə verilir".

Arif ölkədə hər il 1 milyon iş yeri yaradacağına söz verərək bildirib ki, işsizlik İranın əsas problemlərindən biridir.

Bundan əlavə, o bildirib ki, prezident seçiləcəyi təqdirdə, sərhədyanı vilayətlərin inkişafı onun administrasiyasının əsas prioritetlərindən biri olacaq.

İranda 11-ci prezident seçkiləri bu il iyunun 14-də keçiriləcək.