İran polisinin müsəlman qadınlar üçün məcburi baş örtüyünə qarşı çıxanlara daha sərt tədbirlər planına baxmayaraq, sosial mediada yayımlanan xəbərlər və görüntülərdə iranlı qadın və qızların bəzilərinin buna müqavimət göstərdiklərini görmək olur.
Tehran Universitetinin Psixologiya və Sosial Elmlər fakültəsinin tələbələri geyimə nəzarət siyasətinə və təhlükəsizlik qüvvələrinin kampusda hicabın məcburi geyinilməsini tətbiq etmək üçün təzyiqinə etiraz etmək üçün aprelin 17-də bir araya gəlib.
Hicaba qarşı çıxan iranlı qadınlar da polisin smart-kameralardan istifadə edərək, günahkarları müəyyən etmək planına etiraz olaraq, məcburi baş örtüksüz olan şəkillərini sosial mediada yerləşdirməyə davam edib.
İslam Respublikası polis qüvvələrinin komandiri aprelin 16-dan etibarən polisin hicabsız qadınları müəyyən etmək və "məhkəmələrə" göndərmək üçün şəhərlərdə qapalı dövrəli televiziya kameraları və smart-sistemlərdən istifadə ediləcəyi ilə hədələyib.
İranda hicab 1979-cu il inqilabından qısa müddət sonra İslam Respublikasının banisi Ayətulla Ruhulla Xomeyninin əmri ilə məcburi olub. Lakin o vaxt İranda qadınların geyimini məhdudlaşdıran qanun qəbul edilməmişdi.
Qırx ildən artıqdır ki, İslam Respublikasında hicabın məcburi tətbiqinə baxmayaraq, ölkədə son vaxtlar buna qarşı çıxılır və İslam Respublikası sisteminin devrilməsini tələb edən geniş və əhatəli etirazlar müşahidə olunur.
Keçən ilin sentyabrında 22 yaşlı Məhsa Əmininin qadınların İslami geyim qaydalarını pozduğu iddiası ilə həbs olunarkən ölümündən sonra başlayan son ümummilli etirazlarda iştirak edən tələbələr "Qadın, Həyat, Azadlıq" və ölkənin ali dini lideri Ayətulla Əli Xameneiyini nəzərdə tutaraq, "Diktatora ölüm" şüarları səsləndirib. Bəzi qız tələbələr isə nümayişlərdə baş örtüklərini çıxarıb və yandırıb.
