Bəhreyn kralı Həməd Bin İsa Əl-Xəlifə Yaxın Şərqdə münaqişənin yayılması ehtimalı ilə bağlı narahatlıqlar fonunda bazar ertəsi Körfəz dövlətinin paytaxtı Manamada İranın xarici işlər naziri Abbas Əraqçini qəbul edib.
Bəhreynin rəsmi xəbər agentliyinin məlumatına görə, rəsmilər "ikitərəfli əməkdaşlıq və gərginliyin azaldılması və sülh yolu ilə həllin əldə edilməsi səylərinə diqqət yetirərək, regiondakı son hadisələri müzakirə edib".
İsrail Tehranın oktyabrın 1-də hücumuna cavab verməyə hazırlaşdığı bir vaxt Əraqçi gərginliyin azaldılması üçün diplomatik səy göstərərək, təxminən iki həftədir regiona səfər edir.
İsrail hazırda İranın dəstəklədiyi iki silahlı qrupla – Qəzzada fələstinlilərin HƏMAS və Livandakı Hizbullah militant qrupları ilə müharibə vəziyyətindədir.
İran gərginliyin azaldılması çağırışlarını İsrailin istənilən sərt hücumuna cavab təhdidləri ilə balanslaşdırır.
Yaxın Şərqin ən kiçik ölkəsi olan Bəhreynin sünni krallığı dəfələrlə İranı şiə icması arasında iğtişaşları yaratmaqda ittiham edib. Tehran isə bu iddianı rədd edir.
İranın Küveytdəki səfiri Məhəmməd Totonçinin bildirdiyinə görə, Manamadan ayrıldıqdan sonra Əraqçi Küveytə səfər edəcək.
Əraqçinin regiona səfərinə həmçinin Livan, İordaniya, Suriya, Səudiyyə Ərəbistanı, Qətər, Oman, İraq, Misir və Türkiyə də daxil idi. Bu ölkələrdə o, Livan və Qəzzada potensial atəşkəs, eləcə də münaqişənin yayılmasının qarşısının alınması yollarını müzakirə edib.
Bəhreyn İranla əlaqələri Səudiyyə Ərəbistanının ardınca, 2016-cı ildə Ər-Riyadın İrandakı diplomatik nümayəndəliklərinin Səudiyyə Ərəbistanının tanınmış şiə müsəlman din xadimini edamını pisləyən etirazçıların hücumuna məruz qalmasından sonra kəsib.
Əksəriyyəti şiə olan İran və Səudiyyə Ərəbistanının sünni krallığı əlaqələrini 2023-cü ildə regional ittifaqları dəyişdirən razılaşma əsasında bərpa edib. O vaxt Tehran Bəhreynlə diplomatik əlaqələri bərpa etmək arzusunda olduğunu bildirmişdi.
Forum