İnsan haqları fəallarının çümə axşamı bildirdiyinə görə, tanınmış fəal və jurnalist Sepide Gülianı həbsdən azad edildikdən bir neçə saat sonra ali dini lider Ayətulla Əli Xameneyi əleyhinə şüarlar səsləndirdiyi üçün İran təhlükəsizlik qüvvələri tərəfindən yenidən həbs edilib.
28 yaşlı Güliani 2018-ci ildə tətil hərəkatı ilə bağlı reportaj hazırladığına görə dörd ildən çox həbsxanada saxlandıqdan sonra çərşənbə günü Tehranın Evin həbsxanasından azad edilib.
ABŞ-da yerləşən İnsan Haqları Fəalları Xəbər Agentliyinin məlumatına görə, Güliani çərşənbə günü ailəsi tərəfindən Tehrandan İranın cənub-qərbindəki Xuzistan vilayətinin Dezful şəhərindəki evinə aparılarkən yenidən həbs edilib.
Onun harada saxlandığı və nədə ittiham olunduğu barədə heç bir məlumatın verilmədiyi bildirilib.
Evin həbsxanasından çıxdıqdan dərhal sonra o, sosial media hesablarında paylaşdığı videoda Xameneyi əleyhinə şüarlar səsləndirib.
O, iki dəfə "Zalım Xameneyi, səni yerdə sürükləyərik!" deyə, qışqırıb.
O, həmçinin İslam Respublikasının qadınlar üçün sərt geyim qanununa məhəl qoymayaraq, baş örtüyü örtməyib və video vasitəsi ilə fəalların siyasi məhbus adlandırdığı digər qadınların azadlığa buraxılmasına çağırıb.
İrandan kənarda yerləşən medianın yayımladığı xəbərlərə görə, Gülianinin həbsi İranın mərkəzindəki Arak şəhəri yaxınlığındakı yolda baş verib və ailəsi ilə təhlükəsizlik qüvvələri arasında qarşıdurma olub.
İran Beynəlxalq Televiziyasının bildirdiyinə görə, onun anası da qızı ilə birlikdə polis maşınına mindirilib. Lakin avtomobil sürətlə hərəkət edərkən yolun kənarına atılıb.
Həbsxanada olarkən Gülian tərəfdarlarına məktublar və mesajlar vasitəsilə İran həbsxanalarında zorakılıqlara məruz qaldığı deyilən qadınların güclü səsinə çevrildiyini deyib.
İran həbsxanalarında saxlanılan qadınların çoxu sentyabrın 16-da qadınların geyim qaydalarını pozduğu iddiası ilə həbs edilən kürd Məhsa Əmininin həbsdə öldürülməsi ilə nəticələnən etirazlardan xeyli əvvəl həbs edilib. Lakin sonradan onların sayı artıb.
