Polis cümə axşamı Türkiyənin şimal-qərbində yerləşən Procter & Gamble fabrikində işçiləri girov götürən silahlı şəxsi saxlayıb və yeddi girovu xilas edib. Kocaeli valiliyinin məlumatına görə, bununla İsrailin Qəzzada hərbi kampaniyasına qarşı etiraz aksiyasına son qoyulub.
Kocaeli valiliyi girovların xəsarət almadığını bildirərək, girov götürən şəxslə aparılan danışıqların nəticəsiz qalmasından sonra onların xilas edilməsi əməliyyatına başlanıldığını bildirib.
"Təhlükəsizlik qüvvələrimiz müdaxilə edərək şübhəlini zərərsizləşdirib" deyilən açıqlamada onun "Qəzzanın davam edən işğalına diqqət çəkmək istəyən" fabrik işçisi olduğu vurğulanıb.
P&G bu böhranın öhdəsindən gəldikləri üçün səlahiyyətlilərə təşəkkür edib.
"Heç kimin zərər görməməsi bizim ən böyük rahatlığımızdır. Vəziyyəti cəsarət və peşəkarlıqla idarə edən rəsmilərə və ilk müdaxilə edənlərə minnətdarıq", şirkətin bəyanatında deyilir.
"Ən çox birbaşa təsirə məruz qalan işçiləri, onların ailələrini və bütün P&G icmasını dəstəkləmək üçün səylərimiz davam edir", bəyanatda qeyd edilir.
Girov götürülən şəxs günorta saat 3 radələrində Kocaeli vilayətinin Gebze sənaye zonasında yerləşən fabrikə daxil olub. Dəmirörən xəbər agentliyi daha əvvəl bildirib ki, polis dərhal hadisə yerinə gələrək, onu təslim olmağa razı salmağa çalışıb.
Medianın məlumatına görə, girovlar altı kişi və bir qadın olub.
Yerli medianın daha əvvəl yaydığı fotoda fabrikdə üzü fələstin şərfi ilə örtülmüş və üzərində partlayıcı qurğuya oxşayan cihazın olduğu ihtimal edilən bir kişi əks olunub.
Forum